वल्र्ड लिंकसहितका नौवटा इण्टरनेट सेवा प्रदायकले तिर्नु पर्ने रोयल्टी र दूरसञ्चार कोष बापतको ३ अर्बभन्दा बढी रकम तिर्नको लागि दूरसंचार प्राधिकरणले आदेश दिएको थियो । तर, कम्पनीहरुले तिर्न आनाकानी गरेपछि विवाद सर्वाेच्च अदालत पुगेको थियो । सर्वाेच्चले गत बैशाखमै प्राधिकरणले तोके अनुसारको राजश्व भुक्तानीको लागि कम्पनीहरुलाई आदेश दिएको थियो ।
नौवटा कम्पनीहरुमध्ये सबैभन्दा धेरै एक अर्ब २५ करोड ३४ लाख २९ हजार (गत बैशाखसम्मको) रुपैयाँ वल्र्ड लिंकले तिर्न बाँकी छ ।
सर्वाेच्चले तिर्न आदेश दिए पनि आदेशको पूर्ण पाठ नआएको बाहानामा वल्र्ड लिंकले राजश्व तिरेको छैन । त्यस्तै वर्ल्ड लिंकले २०५५ बैशाखमा २५ वर्षका लागि लिएको लाइसेन्सको अवधि सकिएको ६ महिना पुरा भएको छ । र उसले राजश्व छुट दिएर नविकरणको लागि दौडधुप गरिरहेको छ । जबकी प्राधिकरणले राजश्व तिरेपछि मात्र नविकरण गर्न लिएको अडानलाई सर्वाेच्चले पनि जायज ठहर गरेको छ ।
तर, उसले कर तिर्न चासो नदिई प्राधिकरणको अनुमति नै नलिई दुई वर्षे प्याकेज बिक्रीको अभियान चलाइरहेको छ । त्यसबारे प्राधिकरणमा उजुरी परेपछि वल्र्ड लिंकलाई अनुमति नलिइ काम नगर्न प्राधिकरणले गत साता सचेत गराएको छ । कम्पनीले टीभीसहितको कम्बो प्याकेज भन्दै उसले दुई वर्षका लागि एकैपटक ग्राहकबाट पैसा उठाइरहेको छ । जबकी अनुमति नलिइ कुनै पनि सेवा प्रदायक कम्पनीले प्राधिकरणबाट स्वीकृत नभएको प्याकेज बिक्री गर्न पाउँदैनन् । कति एमबीपीएसको इन्टरनेटको प्याकेजको मूल्य मासिक र वार्षिक कति हुने भन्ने स्पष्ट खुलाएर निवेदन दिनुपर्ने र त्यसमा प्राधिरकणको स्वीकृतिपछि मात्र बिक्री गर्न पाइन्छ । दूरसञ्चार प्राधिकरणको पछिल्लो तथ्यांकअनुसार देशभर वल्र्ड लिंकका ८ लाख २२ हजार ६०९ ग्राहक छन ।
उपभोक्तासँग कसेर भुक्तानी लिने तर राजश्व तिर्न आनाकानी गर्ने बल्र्ड लिंकले पछिल्लो समय संचार मन्त्रालयमा ‘सम्पर्क’ बढाएर प्राधिकरणलाई अटेर गर्ने नीति लिएको देखिएको छ । त्यसक्रममा उसले गत साता मात्र संचार मन्त्री पृथ्वी सुब्बा गुरुङको संचार विज्ञ शालिकराम पराजुलीसँग सम्पर्क बढाइसकेको बताइएको छ । नेपाल टेलिकममा कार्यरत रहँदा बेदाग छविका मानिने पराजुलीले संचारमन्त्रीलाई समेत प्रभावमा पारेर राजश्व छली प्रकरणमा वल्र्ड लिंकलाई साथ दिई राज्यमाथि घात गर्न अग्रसर होलान् र प्राधिकरणलाई नजायज दबाब देलान् भनेर विश्वास मान्न सकिदैन । तर, त्यो थाहा पाउन पनि केही समय कुर्नै पर्छ ।
