नेपाल राष्ट्र बैंकका गभर्नर डा. युवराज खतिवडाले आफ्ना छोराको नाममा लगानी गरेको जनता बैंकले ग्राण्ड समस्यामा परेको मौका च्याप्दै २६ रुपैयाँसम्मको स्वाप रेसियो प्रस्ताव गरेको थियो । जनताको यस्तो हेपाहा प्रस्तावबाट आक्रोशित भएका ग्राण्डका अध्यक्ष स्वरुप गुरुङ कोनेले जब प्रभुका देबीप्रसाद भट्टचनसँग हात मिलाए, त्यसपछि जनताका संचालकहरु नराम्ररी जिल्लिए । कमलादीस्थित ग्राण्ड बैंकको भब्य र सुन्दर भवनलाई केन्द्रीय कार्यालय बनाउने जनताको सपना सपनामै सिमित भएको छ । आफुले तल्लोस्तरको स्वाप रेसियो प्रस्ताव गरेको बैंकलाई प्रभुले ६० भन्दा माथिको आकर्षक स्वाप रेसियो दिएर किनेपछि जनताका संचालकहरुको निन्द्रा भंग हुनु स्वभाविक थियो । यसै कारण पनि ग्राण्डका अध्यक्ष कोनेले प्रभुका अध्यक्ष भट्टचनसँग सम्झौता गरेपछि भनेका थिए– प्रभुसँग जोडिन पाउँदा गौरव लागेको छ ।
ग्राण्ड बैंक गत आर्थिक बर्षको अन्त्यमा दुई अर्ब चुक्ता पूँजी भन्दा बढी रकमले घाटामा गएर राष्ट्र बैंकको शीघ्र सुधारात्मक कारबाही भोगिरहेको थियो भने जनता बैंकको बित्तीय अवस्था पनि आशलाग्दो थिएन । स्रोतका अनुसार यही बेला गभर्नर खतिवडाले पनि दुबै बैंकलाई मर्जमा जान दबाब दिईरहेका थिए । केही दिन भित्रभित्रै घनिभुत छलफल चलाएर ग्राण्ड प्रभुको शरणमा गएको थियो । एक्विजिशनको सहमति माग्न आएपछि मात्र राष्ट्र बैंकका अधिकारीले ग्राण्ड प्रभुमा विलय हुने कुरा थाहा पाएका थिए ।
नेकपा एमाले निकटकै अधिकांश संस्थापक शेयरधनीहरु रहेको मेगा बैंकले त्यस्तै प्रकृतिका शेयरधनीहरु रहेको जनतालाई मर्जमा लैजाला भनी आश गर्नु स्वभाविक थियो । तर, मेगाले जनतालाई मिसाउनु भन्दा राम्रा बिकास बैंक र फाईनान्स कम्पनीहरुलाई गाभ्दा फाईदा हुने देखेपछि त्यतैतिर लागेको छ । मेगाले पश्चिमाञ्चल बिकास बैंकलाई आफुमा मर्ज गर्ने निर्णयमा हस्ताक्षर गरेर अहिले जनता बैंकलाई गतिलो जवाफ दिएको ठानिएको छ । मर्ज भाँडिएको बारेमा जनताका अधिकारीहरुसँग प्रतिक्रिया लिन खोज्दा कोही पनि सम्पर्कमा आउनु भएन ।
मर्ज गर्ने उपयुक्त संस्था नपाएर जनता बैंक अहिले तड्पिएको बताईन्छ । यस आर्थिक बर्षको दोस्रो त्रैमाससम्म दश करोड रुपैयाँ खुद नाफा गरेको जनता बैंकलाई लिन अरु ठूला बाणिज्य बैंक तयार नभएको र उसँग बिक्न साना फाईनान्स र बिकास बैंकहरु पनि उत्साहित नभएकाले मर्जमा जाने जनताको चाहना त्यसै सेलाउन लागेको छ । जनताले मेगासँग चर्को स्वाप रेसियो मागेकाले मर्जको कुरा भाँडिएको थियो । कम स्वाप रेसियो र संचालकहरुको मामिलामा लचक भएमा जनतालाई मेगाले लिने कुरा मिल्नसक्ने संभावना भने बाँकी नै रहेको छ ।
जनतासँग मर्जका लागि टुरिजम बिकास बैंकले पनि ईच्छा ब्यक्त गरेको थियो । बित्तीय अवस्था र कमाई जनताको भन्दा राम्रो भएकाले टुरिजमले जनतासँग चर्को स्वाप रेसियो माग्यो तर जनताका संचालकहरु बिकास बैंकलाई आफुभन्दा बलियो ठान्न तयार भएनन् र अन्ततः टुरिजमसँग पनि मर्ज प्रक्रिया भाँडियो ।
