चालु आवको माघसम्म सुन तथा चाँदी धितो राखेर वाणिज्य बैंकहरुले ६३ अर्ब ८७ करोड ६१ लाख रुपैयाँ ऋण प्रवाह गरेका छन जुन अघिल्लो आवको माघ महिनाको तुलनामा ३१.६४ प्रतिशतले बढी हो । अघिल्लो वर्षको माघ महिनासम्म बैंकहरुले सुन चाँदीको धितोमा ४८ अर्ब ५२ करोड ३१ लाख रुपैयाँ ऋण प्रवाह गरेका थिए ।

अन्तर्राष्ट्रिय बजारमा सुन तथा चाँदीको मूल्य हरेक दिन बढदो अवस्थामा छ । नेपाल सुनचाँदी व्यवसायी महासंघका अनुसार सोमबारका लागि सुनको मूल्य १ लाख ७७ हजार ९ सय रुपैयाँ तोकिएको छ भने चाँदीको मूल्य प्रति तोला २ हजार ३५ रुपैयाँ तोकिएको छ ।

गत वर्ष चैतमा सुनको मूल्य प्रति तोला १ लाख ३० हजार र चाँदी प्रति तोला १५ सय २५ रुपैयाँ थियो । हरेक वर्ष मूल्यवान हुँदै गएको सुन तथा चाँदी धितो राखेर बैंकहरुबाट ऋण लिनेको संख्या पछिल्लो समय बढ्दो क्रममा रहेको छ ।

एकदमै महंगो धातु भएकाले अहिले ग्राहकहरुले आफूसँग सुनका गरगरहना भए पनि बैंकको वा घरको लकरमा सुरक्षित राख्ने प्रचलन पछिल्लो समय बढ्दै गएको छ । त्यसको सट्टा नक्कली सुनको प्रयोग बढेको छ । लकरमा त्यतिकै राख्नुको सट्टा पछिल्लो समय त्यसलाई नै धितोको रुपमा प्रयोग गरेर समेत सर्वसाधारण मानिसले आफ्नो उद्देश्य पूर्तिको लागि ऋण लिने बढेको एक बैंकका शाखा प्रमुखले बताए ।

तथ्यांक अनुसार २० वटा वाणिज्य बैंकमध्ये ५ वटा बैंकले भने सुन तथा चाँदीको धितोमा कुनै कर्जा प्रवाह गरेको देखिएको छैन । स्ट्यान्डर्ड चार्टर्ड बैंक, हिमालयन बैंक, नेपाल एसबीआई बैंक, एभरेष्ट बैंक र ग्लोबल आईएमई बैंकले सुन चाँदीको धितोमा कुनै ऋण प्रवाह गरेको तथ्यांक छैन । राष्ट्र बैंकको तथ्यांक अनुसार सबैभन्दा धेरै नेपाल बैंकले सुन तथा चाँदीको धितोमा २५ अर्ब ५६ करोड रुपैयाँ कर्जा प्रवाह गरेकाे छ जुन अघिल्लो वर्षको माघ महिनाको तुलनामा ४७.२७ प्रतिशतले बढी हो । अघिल्लो वर्षको माघ मसान्तसम्म नेपाल बैंकले १९ अर्ब ३९ करोड रुपैयाँ कर्जा प्रवाह गरेका छन् ।

त्यसैगरी राष्ट्रिय वाणिज्य बैंकले सुन तथा चाँदीको धितोमा २३ अर्ब ५७ करोड रुपैयाँ कर्जा प्रवाह गरेकाे छ जुन अघिल्लो वर्षको माघ महिनाको तुलनामा २४ प्रतिशतले बढी हो । राष्ट्रिय वाणिज्य बैंकले सुन चाँदीको धितोमा १८ अर्ब ९९ करोड रुपैयाँ कर्जा प्रवाह गरेकाे छ ।

दुई वटा सरकारी बैंकपछि निजी क्षेत्रका बैंकमध्ये सबैभन्दा बढी सुन चाँदीको धितोमा कर्जा प्रवाह गर्ने बैंकमा प्राइम कमर्सियल बैंक अगाडि रहेको छ । बैंकले चालु आवको माघ मसान्तसम्म सुन चाँदीको धितोमा ६ अर्ब ९८ करोड रुपैयाँ कर्जा प्रवाह गरेकाे छ जुन अघिल्लो वर्षको सोही अवधिको तुलनामा ८.२२ प्रतिशतले बढी हो । अघिल्लो वर्षको माघ मसान्तसम्म प्राइम कमर्सियल बैंकले ६ अर्ब  ४४ करोड रुपैयाँ कर्जा प्रवाह गरेको थियाे ।

प्राइमपछि नेपाल इन्भेष्टमेन्ट मेगा बैंकले पनि सुन चाँदीको धितोमा उल्लेख्य ऋण प्रवाह गरेकाे छ । बैंकले चालु आवको माघ मसान्तसम्म १ अर्ब ९९ करोड रुपैयाँ ऋण प्रवाह गरेकाे छ जुन अघिलो आवको माघ मसान्तसम्म १ अर्ब ७० करोड रुपैयाँ थियो ।

अन्य बैंकहरुले सुन चाँदीको धितोमा ऋण प्रवाह गरेपनि १ अर्ब भन्दा कम देखिएको छ । नबिल बैंकले ९६ करोड, लक्ष्मी सनराइज बैंकले ७३ करोड, सिटिजन्स बैंकले ७० करोड, माछापुच्छे बैंकले २३ करोड ३१ लाख, प्रभु बैंकले ७ करोड ४० लाख, एनआईसी एसिया बैंकले २ करोड २० लाख, कृषि विकास बैंकले १ करोड ३२ लाख, सिद्धार्थ बैंकले १ करोड, कुमारी बैंकले ४९ लाख र एनएमबी बैंकले ४ लाख रुपैयाँ ऋण प्रवाह गरेका छन् ।