सोमबारको बजारमा सुन प्रतितोला २ लाख ५ हजार ३०० रुपैयाँमा कारोबार भएको सुन, मंगलबार ६०० रुपैयाँ बढेको थियो। बुधबार र बिहीबार भने सुन प्रतितोला २ लाख ७ हजार ९०० रुपैयाँमा कारोबार भएको थियो। साताको अन्तिम दिन अर्थात शुक्रबार सुनको मूल्य २ लाख १० हजार ४०० रुपैयाँ पुगेको थियो। जुन हालसम्मकै उच्च मूल्य हो। पहिलो दिनको तुलनामा अन्तिम कारोबार दिन सुनको मूल्य तोलामा ६ हजार ८०० रुपैयाँले बढेको हो।
विश्वका केन्द्रिय बैंकहरुले अमेरिकी डलर सञ्चितीमा पुनर्विचार गर्ने तयारी साथै डलर सञ्चितीको सट्टामा सुन सञ्चितीलाई जोड दिँदा अन्तरराष्ट्रिय बजारमा सुनको माग उच्च हुँदा नेपालमा पनि त्यसको प्रभाव परेको नेपाल सुनचाँदी व्यवसायी महासंघले जनाएको छ।
यस साता चाँदीको मूल्यले पनि नयाँ रेकर्ड बनाएको थियो। सुन जस्तो आइतबार नै रेकर्ड बनाएको चाँदीको मूल्यले सोमबार, मंगलबार र शुक्रबार क्रमशः रेकर्डहरु तोड्दै नयाँ रेकर्ड बनाएको थियो। शुक्रबार नेपाली बजारमा चाँदी प्रतितोला २ हजार ४९० रुपैयाँमा कारोबार भएको थियो। जुन आइतबारको तुलनामा प्रतितोला ६५ रुपैयाँ बढेको हो।
