पूर्वराजाले वर्तमान परिस्थितिलाई राष्ट्र चरम विध्वंस र शोकको स्थितिमा रहेको भन्दै यसपटकको दसैँलाई पारिवारिक र सांस्कृतिक रूपमा मात्र सीमित गर्न बाध्य भएको बताएका छन्।
घटस्थापनाकै दिन दसैँका अवसरमा शुभकामना सन्देश जारी गर्दै उनले जेन–जी आन्दोलनका क्रममा सहिद भएको घटनाले आमनागरिक शोकमग्न रहेको र वातावरण संवेदनशील भएकाले आफूले सार्वजनिक रूपमा टीका लगाइदिने कार्यक्रम नगर्ने निर्णय गरेको बताए।
‘सही, सत्य, अग्रजको आदर, मर्यादा र अनुशासन कायम राख्ने, राष्ट्रलाई माया गर्ने राष्ट्रिय सोच एवं चेत हामीमा हुनैपर्दछ। जे भयो, अबको नयाँ पुस्ता आशा, विश्वास र भरोसाका साथ अघि बढोस्,’ उनले शुभकामना सन्देशमा भनेका छन् ।
