विगत लामो समयदेखि शेयर बजार साइडवेजमा छ । बजारको यस्तो अवस्थामा नयाँ कम्पनीमा लगानीकर्ताको बढ्दो आकषर्ण देखिन्छ ।

बजारमा पछिल्लो समय सूचीकृत भएका मध्येमा हालै सूचीकृत भएका कम्पनीको शेयर खरिद चाप तुलनात्मक रुपमा धेरै देखिन्छ । नयाँ कम्पनीको कारोबार योग्य शेयर कम रहेको हुन्छ । सोही कारण लगानीकर्ताहरु नयाँ कम्पनीको शेयर खरिद गर्नका लागि लालायित भएका हुन् ।

पछिल्ला केही दिन करेक्सन पछि बढ्न थालेको बजारमा पुनः नयाँ कम्पनीहरुमा नै चार्म देखिएको छ । विगत लामो समयदेखि लगानीकर्ताको रोजाईमा नयाँ सूचीकृत कम्पनी नै पर्न थालेका हुन् ।

नेप्सेमा पछिल्लो समय नयाँ सूचीकृत कम्पनीहरूको शेयर मूल्य तीव्र रूपमा बढिरहेको छ । पुराना तथा ठूला कम्पनीहरू अपेक्षाकृत रुपमा बढ्न सकेका छैनन । नयाँ कम्पनीहरूमा कारोबार योग्य शेयर संख्या कम हुनु हो । नयाँ कम्पनीहरुमा सीमित आपूर्ति र उच्च माग बढेको लगानीकर्ताहरु बताउने गरेका छन् ।

त्यसैगरी, अहिलेको अवस्थामा नेप्से सूचक साइडवेजमा छ । बजार केही दिन बढेता पनि दीगो हुन सकेको छैन् । बजार समग्र रूपमा स्पष्ट दिशाबिहीन हुँदा लगानीकर्ता छिटो ‘मुभमेन्ट’ हुने शेयरतर्फ आकर्षित भएको लगानीकर्ता दिनेश हुमागाँईले बताए ।

बैंकको ब्याजदर घटेको छ, बजारमा तरलता पर्याप्त छ । नीतिगत सहजता आएको छ र ब्रोकर मार्फत मार्जिन सुविधा उपलब्ध भएकाले बजारमा थप ऊर्जा आउनुपर्ने समयमा कम सप्लाई भएका अथार्त नयाँ कम्पानी मात्रै चलेका हुन् । पुराना कम्पनीहरुको मूल्यमा खासै उतारचढाब नहुँदा बजार प्रति आम लगानीकर्ताको आत्मविश्वास बलियो भइनसकेको उनको बुझाई छ ।

त्यसैगरी, बढ्दो चुनावी रौनकले लगानीकर्ताको मनोवल बढाउन सकेको देखिदैन । चुनावको समयमा सूचकमा सुधार हुने अपेक्षा गरेका लगानीकर्ता निर्वाचनको मिति नजिक आउँदै गर्दा समेत बजार नियमित प्रकृया अनुसार नै रहेको छ । चुनावले लगानीकर्तामा राजनीतिक स्थिरताको आशा जगाउने र त्यसले बजारमा सकारात्मक मनोविज्ञान सिर्जना गर्ने अपेक्षा थियो । तर यसपटक निर्वाचनले स्पष्ट राजनीतिक धार नसमातेका कारण लगानीकर्तामा दुविधा देखिएको लगानीकर्ता बताउने गरेका छन् ।

अहिले लगानीकर्ता सचेत छन् । उनीहरुले चुनावको समयमा बजार बढ्छ भनेर आँखा चिम्लेर कारोबार गरेका छैनन । एक त नयाँ–पुराना दलबीचको प्रतिस्पर्धाले स्पष्ट सत्ता समीकरण बन्ने संकेत देखिएको छैन । आगामी सरकारबारे अन्योल कायम रहेको छ । यही कारण लगानीकर्ताहरू “पर्ख र हेर”काे रणनीतिमा बसेका छन् । यसको मतलब चुनाव पछिको परिणाम र सरकारलाई हेरेर मात्रै लगानी बढाउने सोचमा लगानीकर्ताहरु रहेको हुमागाँईले बताए ।