भेटपछि सामाजिक सञ्जाल एक्स (ट्विटर) मा सन्देश जारी गर्दै कान्डाले प्रधानमन्त्री शाहसँग भेट्न पाउनु आफ्नो लागि सम्मानको कुरा भएको र उनले पाएको बलियो जनमतका लागि बधाई दिएको उल्लेख गरेका छन्।
भेटका क्रममा कान्डाले नेपालको आर्थिक रूपान्तरण, रोजगारी सिर्जना र लगानीका लागि प्रधानमन्त्रीले अघि सारेका महत्त्वाकांक्षी सुधारका योजनाहरूमा एडिबीको बलियो प्रतिबद्धता रहने स्पष्ट पारे।
नेपालको सबैभन्दा ठूलो विकास साझेदारको रूपमा स्थापित हुँदै एडिबीले प्रधानमन्त्रीको सोच र योजनालाई तल्लो तहसम्म परिणाममुखी बनाउन सन् २०२९ सम्म थप २.४ अर्ब अमेरिकी डलर (करिब ३ खर्ब २० अर्ब रुपैयाँभन्दा बढी) सहयोग गर्ने घोषणा गरेको छ।
विगत ६० वर्षदेखि नेपाल र एडिबीले विभिन्न अप्ठ्यारा परिस्थिति, पुनर्उत्थान र प्रगतिका चरणहरूमा सहकार्य गर्दै आएका छन्। यस अवधिमा सुरक्षित विद्यालय, स्वच्छ ऊर्जा, बलियो पूर्वाधार र राम्रा अवसरहरू सिर्जना गर्न दुवै पक्षले मिलेर काम गरेको कान्डाले स्मरण गरेका छन्।
कान्डाले आगामी दिनमा पनि नेपालका जनताका लागि ठोस र दिगो प्रगति हासिल गर्न प्रधानमन्त्री र उनको सरकारसँग निकट रहेर काम गर्न आफू उत्सुक रहेको बताएका छन्।
