विश्वप्रसिद्ध अटोमोबाइल कम्पनी फोक्सवागनले भारत र दक्षिण एसियाली बजारलाई लक्षित गर्दै सन् २०२७ मा नयाँ ‘सब–४ मिटर’ (४ मिटरभन्दा कम लम्बाइ भएको) एसयूभी सार्वजनिक गर्ने तयारी गरेको छ।

हालसम्म आधिकारिक नाम सार्वजनिक नगरिएको यो नयाँ मोडलले अत्यधिक प्रतिस्पर्धात्मक कम्प्याक्ट एसयूभी सेगमेन्टमा फोक्सवागनको उपस्थिति बलियो बनाउने विश्वास गरिएको छ।

फोक्सवागनको यो नयाँ एसयूभी हालै सार्वजनिक भएको ‘स्कोडा काइलाक’मा आधारित हुनेछ। स्कोडा कुशाक र फोक्सवागन टाइगुन जस्तै यी दुई मोडलले पनि एउटै प्ल्याटफर्म (MQB A0), इन्जिन र धेरैजसो कम्पोनेन्टहरू साझा गर्नेछन्। यद्यपि, फोक्सवागनले यसलाई आफ्नो छुट्टै र विशिष्ट डिजाइन भाषामा प्रस्तुत गर्नेछ।

मूल्य र प्रतिस्पर्धा

भारतीय बजारमा यसको मूल्य ८ लाखदेखि १३ लाख भारुको बीचमा रहने अनुमान गरिएको छ। बजारमा आएपछि यसले मारुती सुजुकी ब्रेजा, टाटा नेक्सन, हुन्डाई भेन्यु, किया सोनेट, महिन्द्रा XUV 3XO र स्कोडा काइलाकसँग सिधा प्रतिस्पर्धा गर्नेछ।

डिजाइन र बाहिरी बनोट

यो नयाँ एसयूभीको डिजाइन ब्राजिलियन बजारमा उपलब्ध  फोक्सवागन टेराबाट प्रभावित हुन सक्ने बताइएको छ। यसमा स्लिम एलईडी हेडल्याम्प, आकर्षक डिआरएल, स्ट्रिप, रुफ रेल र पछाडि कनेक्टेड एलईडी टेलल्याम्पहरू हुनेछन्। भारतको कर नियमअनुसार सहुलियत पाउन यसको लम्बाइ ४ मिटरभन्दा कम राखिनेछ। साथै, कम्पनीले यसको स्पोर्टी 'GT'  संस्करण पनि ल्याउन सक्नेछ।

आधुनिक फिचर्स र इन्टेरियर

गाडीको भित्री भाग (इन्टेरियर) प्रविधिमैत्री र सुविधासम्पन्न हुनेछ। यसमा १० इन्चको ठूलो टचस्क्रिन इन्फोटेनमेन्ट सिस्टम, डिजिटल ड्राइभर डिस्प्ले, वायरलेस स्मार्टफोन कनेक्टिभिटी, अटोमेटिक क्लाइमेट कन्ट्रोल, सनरुफ, वायरलेस चार्जर र भेन्टिलेटेड सिटहरू जस्ता आधुनिक सुविधाहरू उपलब्ध हुनेछन्।

इन्जिन र प्रदर्शन

यसमा १.० लिटरको  डाइरेक्ट-इन्जेक्सन टर्बोचार्ज्ड पेट्रोल इन्जिन हुनेछ, जुन स्कोडा काइलाकबाट लिइनेछ। यो इन्जिनसँगै ६-स्पिड म्यानुअल र ८-स्पिड अटोमेटिक ट्रान्समिसन (गियरबक्स) को विकल्प ग्राहकले पाउनेछन्।

फोक्सवागनको यो नयाँ प्रवेशले सस्तो र गुणस्तरीय जर्मन प्रविधि खोज्ने ग्राहकहरूका लागि नयाँ विकल्प प्रदान गर्ने देखिएको छ।