समितिका अनुसार शिव शिखर, कान्तिपुर, कृषि विकास र गोर्खा सहकारीका साना बचतकर्ताले बचत रकम फिर्ता पाएका छन् । लामो समयदेखि सहकारीमा बचत फसेका बचतकर्तामध्ये पहिलो चरणमा कम रकम बचत गरेका व्यक्तिलाई रकम फिर्ता गरिएको समितिले जनाएको छ ।
सरकारले समस्याग्रस्त सहकारीबाट ऋण असुली तथा सम्पत्ति व्यवस्थापनबाट प्राप्त रकम बचतकर्तालाई फिर्ता गर्ने व्यवस्था गरेको छ । सोही आधारमा सहकारीबाट असुल भएको रकम सम्बन्धित बचतकर्तालाई फिर्ता गर्न थालिएको हो ।
समितिले बचतकर्तालाई रकमका आधारमा वर्गीकरण गरी क्रमशः बचत फिर्ता गर्दै जाने जनाएको छ । समस्याग्रस्त सहकारी संस्थाबाट ऋण असुली र सम्पत्ति व्यवस्थापनको कामलाई पनि निरन्तरता दिइएको समितिको भनाइ छ ।
असुली तथा सम्पत्ति व्यवस्थापनबाट प्राप्त हुने रकमका आधारमा थप बचतकर्ताको रकम फिर्ता गरिने समितिले स्पष्ट पारेको छ । बचत फिर्ताको प्रक्रिया प्रचलित कानुनी व्यवस्थाअनुसार सञ्चालन भइरहेको समितिले जनाएको छ ।
