नेपालीहरूको दोस्रो ठूलो चाड तिहारलाई लक्षित गर्दै अटोमोबाइल कम्पनीहरूले ग्राहक आकर्षित गर्न विभिन्न छुट तथा उपहार योजना सार्वजनिक गरेका छन्। 

चारपाङ्ग्रे तथा दुईपाङ्ग्रे सवारीसाधन खरिदमा कम्पनीहरूले नगद छुट, बीमा, सडक कर, निःशुल्क सर्भिसिङ, एक्सचेन्ज बोनसदेखि आकर्षक उपहार र पुरस्कार जित्ने अवसरसम्मका योजना ल्याएका हुन्।

चाडपर्वको अवसरमा सवारीसाधन खरिद गर्ने ग्राहकलाई लक्षित गर्दै विभिन्न कम्पनीले लाखौँ रुपैयाँसम्मको छुट तथा थप सुविधा उपलब्ध गराएका छन्। केही कम्पनीले नगद छुटसँगै बीमा र सडक करको सुविधा दिएका छन् भने केहीले स्क्र्याच कार्ड, लक्की ड्र र उपहारमार्फत ग्राहक आकर्षित गर्ने प्रयास गरेका छन्।

चारपाङ्ग्रे सवारीमा १२ लाखसम्मको फाइदा

चारपाङ्ग्रे सवारीतर्फ होन्डाले ‘सफर’ योजनाअन्तर्गत १० लाख रुपैयाँसम्म नगद छुट उपलब्ध गराएको छ। यसका अतिरिक्त एक आर्थिक वर्षको सडक कर, पूर्ण बीमा, पाँच वर्षसम्म निःशुल्क सर्भिसिङ र एक वर्षको रोडसाइड असिस्टेन्स सुविधा दिएको छ। पुरानो गाडी एक्सचेन्ज गर्दा थप बोनससमेत पाइने कम्पनीले जनाएको छ।

हुन्डाईले ‘फेस्टिभ ड्राइभ’ योजनाअन्तर्गत तीन लाख रुपैयाँसम्म नगद छुट र स्क्र्याच कार्डमार्फत थप पाँच लाख रुपैयाँसम्म छुट जित्ने अवसर दिएको छ।

त्यस्तै, सुजुकी ब्रेजा खरिदमा एक लाख रुपैयाँसम्म नगद छुट र एक्सचेन्जमा थप एक लाख रुपैयाँसम्म छुट उपलब्ध छ। फ्रन्क्स खरिदमा एक लाख रुपैयाँसम्म नगद छुट, एक्सचेन्जमा ५० हजार रुपैयाँसम्म छुटका साथै निःशुल्क एसेसरिज र अटो प्लस बीमाको सुविधा दिइएको छ।

अशोक लेल्यान्डले गाडी खरिदमा बाली भ्रमण वा सामसुङको ५५ इन्चको फोरके टेलिभिजनमध्ये एक विकल्प रोज्न सकिने योजना ल्याएको छ। कम्पनीले अर्को कम्बो योजनाअन्तर्गत सामसुङको ४५ इन्चको टेलिभिजन र ग्यालेक्सी एस२६ समेत उपलब्ध गराउने जनाएको छ।

म्याक्सस नेपालले २० प्रतिशत डाउनपेमेन्टमा गाडी खरिद गर्न सकिने सुविधा ल्याएको छ। ग्राहकले सात वर्षसम्मको किस्ताबन्दी, एक वर्ष निःशुल्क चार्जिङ र एक वर्षको अटो प्लस बीमाको सुविधा पाउनेछन्।

निसानले गाडी खरिदमा एक वर्षको बीमा, सडक कर र गाडी वासको सुविधा दिने जनाएको छ। त्यस्तै, बीएसी आयोनले नौ लाख रुपैयाँसम्म छुट र एक्सपेडले १२ लाख रुपैयाँसम्मको फाइदा उपलब्ध गराउने योजना ल्याएका छन्।

टीभीएस ईभी खरिदमा १० हजारसम्म नगद छुट

दशैं–तिहारलाई लक्षित गर्दै टीभीएसले आफ्ना विद्युतीय स्कुटर अर्बिटर र आइक्यूब इलेक्ट्रिकमा आकर्षक अफर सार्वजनिक गरेको छ।

योजनाअन्तर्गत ग्राहकले हरेक साता एक गोल्ड क्वाइन जित्ने अवसर पाउनेछन्। त्यस्तै, स्कुटर खरिदमा १० हजार रुपैयाँसम्म नगद छुट र प्रत्येक खरिदमा गिफ्ट ह्याम्पर उपलब्ध गराइने कम्पनीले जनाएको छ।

पुरानो सवारीसाधन एक्सचेन्ज गर्दा उत्कृष्ट मूल्यांकन, शून्य प्रतिशत ईएमआई तथा छिटो फाइनान्स सुविधा पनि उपलब्ध हुनेछ। कम्पनीले निःशुल्क हेल्मेटका साथै स्कुटरमा पाँच वर्षको वारेन्टीसमेत दिने जनाएको छ।

तिहारमा होन्डा डियोका विभिन्न रंग उपलब्ध

होन्डा नेपालले तिहारलाई लक्षित गर्दै डियो ११० बीएस६ का विभिन्न कलर भेरियन्ट पुनः बजारमा उपलब्ध गराएको छ।

ग्राहकको रोजाइ र स्टाइललाई ध्यानमा राख्दै कम्पनीले विभिन्न रंगका स्कुटर उपलब्ध गराएको हो। यससँगै ग्राहकले आफूलाई मनपर्ने रंग छनोट गरी नयाँ स्कुटर खरिद गर्न सक्नेछन्।

यामाहाको ‘चंगा चेट’मा १० लाखसम्म क्यासब्याक

चाडपर्वको अवसर पारेर यामाहाले ‘चंगा चेट’ योजना सार्वजनिक गरेको छ। यस योजनाअन्तर्गत ग्राहकले १० लाख रुपैयाँसम्म क्यासब्याक जित्ने अवसर पाउनेछन्।

योजनाअनुसार स्क्यान गरी दर्ता गर्दा एक लाख रुपैयाँसम्म क्यासब्याक जित्न सकिनेछ। त्यस्तै, सवारीसाधन खरिद प्रमाणित गरेपछि १० लाख रुपैयाँसम्म क्यासब्याक जित्ने अवसर रहेको कम्पनीले जनाएको छ।

यसका अतिरिक्त योजनामा सहभागी ग्राहकले साप्ताहिक रूपमा विभिन्न हाइटेक ग्याजेट जित्न सक्नेछन्। योजनाको बम्पर पुरस्कारका रूपमा यामाहा आर१५ मोटरसाइकल राखिएको छ।

यामाहाले नयाँ मोटरसाइकल वा स्कुटर खरिद गर्न चाहने ग्राहकका लागि सहज फाइनान्स सुविधा, स्पट एक्सचेन्ज तथा विभिन्न आकर्षक अफरसमेत उपलब्ध गराएको जनाएको छ।

समग्रमा, तिहारलाई लक्षित गर्दै अटोमोबाइल कम्पनीहरूले नगद छुट, उपहार, बीमा, एक्सचेन्ज तथा किस्ताबन्दी सुविधामार्फत ग्राहकलाई आकर्षित गर्ने प्रतिस्पर्धा तीव्र बनाएका छन्। यसले चाडपर्वको समयमा नयाँ सवारीसाधन खरिद गर्ने ग्राहकलाई विभिन्न विकल्प र सुविधा उपलब्ध गराएको छ।