आफ्नो रुढिवादी कोलोराडो पार्टीको समर्थन गुमाएपछि र संसद्ले महाभियोग प्रक्रिया अघि बढाउन लागेको केही घण्टाअघि पेनाले बिहीबार पद छाडेका हुन् ।
सामाजिक सञ्जालमा जारी विज्ञप्तिमा उनले आफूमाथिका आरोपको प्रतिरक्षा गर्न सिनेटमा उपस्थित हुने बताएका छन् । ग्राहकको खातासम्बन्धी समस्या तत्काल समाधान गर्नुपर्नेमा पनि उनले जोड दिएका छन् ।
पेनाको राजीनामापछि पाराग्वेको सार्वभौम बन्डको मूल्य घटेको छ । मुद्रा गुआरानी अमेरिकी डलरको तुलनामा कमजोर हुँदै प्रतिडलर ६ हजार ४९० मा झरेको छ । सो दिन यसको मूल्य करिब पाँच प्रतिशतले घटेको थियो ।
यसै साता केन्द्रीय बैंकले न्यूनतम शोधन क्षमता सम्बन्धी मापदण्ड उल्लंघन गरेको भन्दै यूएनोमाथि हस्तक्षेप गरेपछि संकट चुलिएको थियो । घटनापछि केन्द्रीय बैंकका प्रमुखले पद छाडेका छन् भने यूएनोका आठ कार्यकारीविरुद्ध पक्राउ पुर्जी जारी भएको थियो । उनीहरूले पछि आत्मसमर्पण गरेका थिए ।
६५ लाख जनसंख्या भएको पाराग्वेमा यूएनो सामान्य फिनटेक कम्पनीबाट विस्तार हुँदै मध्यम आकारको बैंक बनेको थियो । यसले करिब ३० लाख ग्राहकलाई सेवा दिनुका साथै सरकारी निकाय र पेन्सनसँग सम्बन्धित रकमसहित करिब ८५ करोड अमेरिकी डलर बराबरको सार्वजनिक कोष व्यवस्थापन गर्दै आएको थियो ।
बैंकको पतनपछि बचत, भुक्तानी र भत्ताका लागि यूएनोमा निर्भर लाखौँ ग्राहक प्रभावित भएका छन् ।
विपक्षी सांसदहरूले पेनामाथि स्वार्थको द्वन्द्व, पेन्सन कोषको दुरुपयोग र बैंकलाई छानबिनबाट जोगाउन सहयोग गरेको आरोप लगाएका छन् । पेनाले भने कुनै पनि गैरकानुनी काममा संलग्नता अस्वीकार गर्दै यसलाई नियामकीय विषयका रूपमा प्रस्तुत गरेका छन् । रोयटर्स
