एस जय शंकरलाई बिदेशमन्त्री चयन गरेपछि मोदीको दोश्रो कार्यकालमा नेपाल भारत सम्वन्ध कस्तो होला भन्ने अनुमान लगाउन थालिएको छ । एस जयशंकर तिनै हुन, जसको गलत ब्रिफिङका कारण भारतले नौ महिना लामो नाकावन्दी गरेको थियो । जसको समष्टीगत असर नेपाली समाजमा कस्तो पर्यो, त्यो जगजाहेर छ । त्यो बेला नेपालको कुल ग्राहस्थ उत्पादन ०.६३ प्रतिशतले हुने अनुमान गरिएपनि नाकावन्दीकै कारण ०.२० मा सिमित भएको थियो । जय शंकर बिदेशमन्त्री चयन हुँदा सबैभन्दा प्रभावित कुनै देश हुन्छ भने त्यो नेपाल नै हुने छ ।
कर्मचारीतन्त्र हावी हुने
मोदी सरकारमा जयशंकरको उपस्थितिले भारत नेपाल सम्वन्ध राजनैतिक तहमा भन्दा पनि कर्मचारीतन्त्रकै प्रभावमा रहने स्पष्ट छ ।
लामो समयसम्म भारतको बिदेश मन्त्रालय हेरेका कर्मचारीले बिदेश मन्त्रालय सम्हाल्दा नेपाल भारत सम्वन्ध सुरक्षामा आधारित साउथ व्लक निर्देशित हुनेछ ।
खुल्ला सीमाना रहेका दुवै मुलुक धार्मिक साँस्कृतिक र सामाजिक रुपमा रोटीबेटीको सम्वन्धमा आधारित रहेको व्याख्या राजनीतिक रुपमा हुने गरे पनि अवको चार बर्ष नेपाल भारत सम्वन्ध नेपालले चीनसँग गर्ने व्यवहार र गतिबिधिमा आधारित सामरिक हुने अनुमान छ ।
भारतमा काँग्रस आइ नेतृत्वमा सरकार हुँदा जस्तो कर्मचारीतन्त्रको दवदवा थियो, अव त्यही पुनराबृत्ति हुने स्थिति देखिँदैछ । राजनीतिक तहमा छलफल भएर सल्टिनु पर्ने कयौ कुटनीतिक समस्या अव कर्मचारी तहमा पुगेर अड्किने छ । एउटा सह सचिवस्तरको कर्मचारीको हैसियत अब क्याविनेटमन्त्री भन्दा शक्तिशाली हुने छ ।
राजनीतिक चलखेल
बिदेशमन्त्रीको रुपमा जयशंकर आएपछि संबिधान निर्माणमा रहेका तत्कालीन असन्तुष्टिलाई बाहिर ल्याउन अनेकौ प्रयत्न गर्न सक्ने छन् । मधेशी दलहरुलाई प्रयोग गर्दा आत्मघाती भएको बिगतको नजिरलाई टेकेर उनले ठुलै पार्टीहरुमा खेल्न प्रशस्त गृहकार्य गरे अनौठो हुने छैन ।
सत्तारुढ दल नेकपा यसैपनि सिसाको घर जस्तै छ । रक्सौलबाट ढुंगा हान्दा नभएको अस्त्र धुम्वाराहीका गएर हाने कामयावी हुनसक्ने बिश्लेषणमा साउथ व्लक पुग्न सक्छ ।
भारतीय प्रधानमन्त्री मोदीको सपथ ग्रहण समारोहमा प्रधानमन्त्री ओली दिल्ली टेक्दै गर्दा काठमाण्डौमा प्रचण्ड निकटबाट गोप्य सहमति सार्वजनिक गरिनु संयोग मात्र होइन । सत्ता साझेदारीमा भएको गोप्य सहमति पेचिलो बन्दै गए त्यसमा भारत नछिर्ने भन्ने हुँदैन । सत्ता जोगाउन या प्राप्त गर्न ओली या दाहाल जो कोहीले पनि संबिधान संसोधनमा अर्को गोप्य हस्ताक्षर गरे, अनौठो मानिने छैन । सत्तारुढ नेताहरुलाई भिडाएर संबिधान संशोधन अगाडि बढे जयशंकरको पुरानो तुष्टि मेटिने मात्र होइन, उनी नेपाल नीतिमा सफल हुनेछन् ।
भारतमा भाजपा दोश्रो पटक बिजयी भएपनि नेपालका हिन्दूवादीहरु, बिशेष गरी राप्रपा उत्साहित हुनु पर्ने अवस्था रहन्न । नेपालमा हिन्दू राज्य कायम गर्ने रणनीति तत्कालका लागि सफल हुने नदेखेपछि भारत आफनो चासो रहँदा रहँदै पनि त्यो बिषयमा प्रवेश गर्न चाँहदैन ।
चीनलाई रोक्न खोजिने
नेपालका परियोजनाहरुमा देखिएको चीनको अग्रसरता, चासो र लगानीबाट भारत चिन्तित देखिन्छ । बिआरआइ मार्फत नेपालमा देखिएको लगानी उत्साहलाई भारतले थप गंभीरता पुर्वक लिने स्पष्ट छ । नेपालको राष्ट्यि महत्वका निर्माणाधीन या अध्ययनका रुपमा रहेका पुर्वाधार, जलबिद्युत लगायतका परियोजनाहरुमा भारतको स्वार्थ अबको दिनमा अझ बढ्ने छ । चीनसँग केही समय अघि भएको पारवहन सम्झौतालाई सिथिल पार्न नेपाललाई दिइसकेको हवाइ रुटलाई टार्न खोजिन्छ भने बिद्युत खरीद, जल परिवहन लगायतमा भएको सम्झौतामा अत्तो थाप्न सक्ने छ ।
पाकिस्तानी शंका
भारतमा भाजपाले चुनाव जितेकै दिन त्रिभुवन बिमानस्थलमा ठूलो मात्रामा भेटिएको नक्कली नोटको समाचारलाई भारतका सुरक्षा संयन्त्रहरुले नोटिसमा नराख्ने कुरै हुँदैन । नेपालको बिमानस्थलको सुरक्षाप्रति भारतले जहिले पनि प्रश्न उठाउने गरेको छ । एअर मार्सलको मुद्दालाई लाद्न नसकेको भारतले फेरि एकपटक सो मुद्दा उठाउन सक्ने छ । तराईका बिभिन्न जिल्लाहरुमा रहेका मदरसा र मुस्लिम बहुल वस्तीहरु भारतको नजरमा जहिले पनि पाकिस्तानी पृष्ठपोषण हुन भन्ने पुरानै मान्यता छ । पाकिस्तानका कटु आलोचक जय शंकर आएपछि तराईका मुस्लिम बहुल क्षेत्रमा भारतीय खुफिया एजेन्सीहरुले थप उपस्थिति जनाउने छन् । शंका कै आधारमा नेपालभित्र आएर मुस्लिम अगुवालाई मार्न सक्ने भारतीय खुफिया एजेन्सीहरु पाकिस्तान फोवियाबाट कति ग्रस्त छन् भन्ने कुरा उनीहरुले गरेको हत्या श्रृंखलाले पुष्टि गर्छ ।
भारतमा को विदेशमन्त्री बन्छन् भन्ने कुरा भारतको विशुद्ध आन्तरिक मामिला हो तर नेपाली राजनीति यसकारण पनि त्रसित छ कि यहाँका राजनीतिज्ञ र कर्मचारीतन्त दिल्लीकै छाता ओढ्न रुचाउँछन् । आफु आन्तरिक रुपमा एकताबद्ध र सुदृढ नभएपछि बाहिरीबाट प्रभावित हुनु र चल्नु स्वभाविक बन्न जान्छ । नेपालको राजनीतिक र कर्मचारी ब्यवस्थामा भारतीय छायाँ हटाउनु चानचुने कुरा हैन, जो तत्काललाई असंभव जस्तै छ तर नेपालीहरु एकताबद्ध भए भने छिमेकीका कुटिल चाललाई परास्त गर्नसक्ने संभावना पनि उत्तिकै छ ।