समीक्षा अवधिमा निर्धन उत्थानको चुक्ता पूँजी २० प्रतिशत बढ्दा नाफा ४३ प्रतिशत बढेको हो। लघुवित्तको चुक्ता पूँजी २० प्रतिशत बढेर १ अर्ब २० करोड कायम भएको छ। लघुवित्तले अघिल्लो आर्थिक वर्षको मुनाफाबाट २० प्रतिशत बोनस शेयर वितरण गरेर चुक्ता पूँजी बढाएको हो।
लघुवित्तले असोज मसान्तसम्ममा ११ अर्ब ६५ करोड ३ लाख रुपैयाँ निक्षेप र ७ अर्ब ५६ करोड ४९ लाख सापटीबाट कूल २० अर्ब १३ करोड ७० लाख रुपैयाँ कर्जा परिचालन गरेको छ। जसबाट लघुवित्तले ४५ करोड ८८ लाख रुपैयाँ खुद ब्याज आम्दानी गर्न सफल भएको छ। यो गत आवको यसै अवधिको तुलनामा ७ करोड ७५ लाख रुपैयाँले बढी हो।
पहिलो त्रैमासको अन्त्यसम्ममा लघुवित्तको जगेडा कोषमा २ अर्ब २९ करोड ९८ लाख रुपैयाँ जम्मा भएको छ। जुन गत आवको यसै अवधिको तुलनामा ३१.५८ प्रतिशत बढी हो। त्यसैगरी, लघुवित्तले सो अवधिसम्ममा ३४ करोड १७ लाख रुपैयाँ सञ्चालन मुनाफा आर्जन गरेको छ।
गत आवको मुनाफाबाट २५ प्रतिशत बोनस शेयर र १५.५३ प्रतिशत नगद लाभांश घोषणा गरेको यस लघुवित्तको निष्क्रिय कर्जा भने गत आवको तुलनामा ०.२८ प्रतिशत विन्दु बढेर १.३० प्रतिशत पुगेको छ। लघुवित्तले सम्भावित जोखिम बापतको व्यवस्थामा ३ करोड २५ लाख रुपैयाँ छुट्याएको छ।
चुक्ता पूँजीको अनुपातमा खुद नाफा धेरै बढेपछि लघुवित्तको प्रतिशेयर आम्दानी पनि बढेको छ। गत आवको असोज मसान्तसम्ममा ६० रुपैयाँ ३१ पैसा रहेको लघुवित्तको प्रतिशेयर आम्दानी चालु आवको सोही अवधिमा बढेर ७२ रुपैयाँ १२ पैसा कायम भएको छ। लघुवित्तको मूल्य आम्दानी अनुपात १५.९३ गुणाबाट घटेर ११.१२ गुणा कायम भएको छ भने प्रतिशेयर नेटवर्थ १७ रुपैयाँ २२ पैसा बढेर २९२ रुपैयाँ कायम भएको छ।
यस लघुवित्तले हाल ७७ वटै जिल्लामा १८९ शाखा कार्यालयमार्फत सेवा दिइरहेको छ। पहिलो त्रैमासको अन्त्यसम्ममा लघुवित्तले कुल ३ लाख ६४ हजार ९३९ परिवारलाई लघुवित्त सेवा दिएको कम्पनीले बताएको छ।