बीमा समितिले उपलब्ध गराएको तथ्यांक अनुसार चालू आर्थिक वर्षको कार्तिकसम्ममा जारी गरिएका बीमालेखको संख्या २५.२६ प्रतिशतले बृद्धि भएकाे छ ।
चालू आर्थिक वर्षको कार्तिक सम्ममा जीवन बीमा कम्पनीहरुले ७६ लाख ९३ हजार ४१७ बीमालेख (म्यादी जीवन बीमालेख बाहेक) जारी गरेको छ । यो गत आर्थिक वर्षको यही अवधिको तुलनामा २५.२६ प्रतिशतले बढी हो । गत वर्षको यही अवधिमा जीवन बीमा कम्पनीहरुले ५४ लाख २३ हजार ५४९ वटा बीमालेख जारी गरेका थिए ।
म्यादी बीमा सहित बीमाको दायरा २६ प्रतिशत पुगेको बीमा समितिको तथ्यांक छ । चालू आर्थिक वर्षको कार्तिक सम्ममा म्यादी बीमालेखको संख्या भने घटेको छ । म्यादी बीमा १०.८५ प्रतिशतले घटेर कार्तिक सम्ममा १४ लााख ३० हजार २८१ बीमालेख जारी भएको छ । गत वर्षको कार्तिकसम्ममा यो संख्या १६ लाख ४ हजार ४४३ रहेको थियो ।
कुल बीमालेखको संख्याका आधारमा भने एक वर्षको अवधिमा जारी बीमालेखको अनुपात १७.०१ प्रतिशतले बढेको छ । कार्तिक सम्ममा जीवन बीमा तर्फ कुल ८२ लाख २३ हजार ६९८ बीमालेख जारी गरी ३० अर्ब ३ करोड रुपैयाँ कुल बीमा शुल्क आर्जन भएको छ । यस्तै निर्जीवन तर्फ ८ अर्ब ७२ करोड रुपैयाँ कुल बीमा शुल्क संकलन गरेको बीमा समितिको तथ्यांक छ ।
चालू आर्थिक वर्षको कार्तिकसम्ममा बीमा कम्पनीका कार्यालयहरु ३५.६४ प्रतिशतले बढेर २ हजार ७५९ पुगेको छ भने कर्मचारीको संख्य २५.७४ प्रतिशतले बढेर १० हजार ६४ जना पुगेको छ ।
