चालु आर्थिक वर्षको पुस मसान्तसम्ममा कम्पनीले ५५ करोड २५ लाख रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा ७७.४२ प्रतिशत बढी हो। गत आर्थिक वर्षको सोही अवधिसम्ममा कम्पनीले ३१ करोड १४ लाख रुपैयाँ खुद नाफा कमाएको छ।
कम्पनीको आम्दानी बढेसँगै खुद नाफा पनि बढ्न पुगेको हो।
समीक्षा अवधिमा कम्पनीको सञ्चालन आम्दानी ३१.८५ प्रतिशत बढेको छ भने अन्य आम्दानी ३९.८८ प्रतिशत बढेको छ। कम्पनीको कुल आम्दानी ३२ प्रतिशत बढेको छ भने कुल खर्च २०.९९ प्रतिशत बढेको छ।
नाफासँगै कम्पनीको प्रतिशेयर आम्दानी पनि बढेको छ। गत आर्थिक वर्षको दोस्रो त्रैमाससम्ममा ६७६ रुपैयाँ २२ पैसा रहेको कम्पनीको यस्तो आम्दानी, चालु आर्थिक वर्षको सोही अवधिसम्ममा बढेर १ हजार १९९ रुपैयाँ ७८ पैसा पुगेको छ। सो अवधिसम्ममा कम्पनीको प्रतिशेयर नेटवर्थ ३ हजार ७२२ रुपैयाँ रहेको छ भने मूल्य आम्दानी अनुपात १५.१२ गुणा रहेको छ।
९ करोड २१ लाख रुपैयाँ चुक्ता पूँजी रहेको यस कम्पनीको जगेडा कोषमा ३ अर्ब ३३ करोड ४५ लाख रुपैयाँ सञ्चित छ।
