भारतमा आईपीओ बन्द भएको तीन दिनमा सूचीकरण गर्नुपर्ने, तर नेपालमा भने महिनाैं दिनसम्म पनि नहुँदा लगानीकर्तालाई नाेक्सानी

Sep 18, 2023 11:35 AM MeroLagani

पछिल्लो समय धेरै कम्पनीहरुले शेयर निष्काशन गरे पनि ती शेयरहरु समयमा दोस्रो बजारमा सूचीकरण हुन सकेका छैनन् । अहिले पनि ५ कम्पनी प्राथमिक निष्काशन भएर बाँडफाँट भएको लामो समय बित्दा पनि नेप्सेमा सूचीकरण हुन सकेका छैनन् ।

भारतले सेप्टेम्बर १ देखि भारतीय शेयर बजार नियामक निकाय सेबीले प्रारम्भिक सार्वजनिक निष्कासन (आईपीओ) बन्द भएको ३ दिनभित्र कम्पनीको शेयर सूचीकरण गर्नुपर्ने नयाँ नियम लागू गरेको छ। यसअघि भारतमा आईपीओ बन्द भएको ६ दिनभित्र शेयर सूचीकरण गर्नुपर्ने नियम रहेकोमा अब ३ दिनमा सूचीकरण गर्नुपर्ने नयाँ नियम लागू गरिएको छ। सेबीले यस सम्बन्धमा पहिले जारी गरेको सूचनामा भनेको थियो कि सेप्टेम्बर १ पछि आउने सबै आईपीओका लागि सूचीकरण समयको नयाँ नियम स्वेच्छिक रूपमा लागू हुनेछन्। यसका साथै डिसेम्बर १ देखि कम्पनीहरुले अनिवार्य रूपमा यो नियम पालना गर्नुपर्नेछ। सेबीको गत जुन २८ मा बसेको बैठकमा आईपीओमा यो नियमलाई अनुमोदन गरेको थियो।

भारतमा शेयर निष्काशन बन्द भएको ३ दिन भित्र सूचीकरण नै भइसक्नु पर्ने छ । तर, नेपालमा भने सो दिनभित्र बाँडफाँट समेत भइनसक्ने अवस्था छ । अहिले कुनै पनि शेयर निष्काशन हुँदा कम्तिमा ४ देखि १० दिनमा बल्ल बाँडफाँट हुने गरेको छ भने बाँडफाँट भएको एक महिनासम्म पनि शेयर सूचीकरण हुने गरेको छैन् ।

अहिलेसम्म आईपीओ बाँडफाँट भएर पनि सूचीकरण नभएका कम्पनीको संख्या ५ पुगिसकेको छ । सबैभन्दा पहिलो आईपीओ बाँडफाँट भएर पनि सूचीकरण नभएको कम्पनी अप्पर लोहोरे खोला हाइड्रोपावर कम्पनी लिमिटेड रहेको छ । कम्पनीको गत साउन २९ गते शेयर बाँडफाँट भए पनि अहिलेसम्म सूचीकरण हुन सकेको छैन् । कम्पनीले साउन १८ देखि २२ गतेसम्म शेयर निष्काशन गरेको थियो ।

त्यसैगरी मनकामना इन्जिनियरिङ हाइड्रोपावर लिमिटेडले साउन २८ देखि ३१ गतेसम्म प्राथमिक शेयर निष्काशन गरी भदौ ३ गते शेयर बाँडफाँट गरेको थियो । आइपीओ बाँडफाँट भएको झन्डै १ महिना बितिसक्दा पनि यो कम्पनीको शेयर नेप्सेमा सूचीकरण हुन सकेको छैन् ।

त्यस्तै सन नेपाल लाइफ इन्स्योरेन्स कम्पनीले साउन ३२ गतेदेखि भदौ ४ गतेसम्म शेयर निष्काशन गरेकोमा भदौ १५ गते शेयर बाँडफाँट भएको थियो । बाँडफाँट भएको १५ दिन भन्दा बढी समय बितिसिक्दा पनि यो कम्पनीको शेयर नेप्सेमा सूचीकरण भइसकेको छैन ।

त्यसबाहेक भगवती हाइड्रोपावले भदौ ५ देखि ८ गतेसम्म शेयर निष्काशन गरी भदौ १८ गते शेयर बाँडफाँट भएको थियो भने मान्डु हाइड्रोपावरले भदौ १० देखि १३ गतेसम्म शेयर निष्काशन गरी गत भदौ २४ गते शेयर बाँडफाँट गरेको थियो । भारतमा लागू भएको जस्तै गरी कानुन बनाएर लागू गर्ने हो भने लगानीकर्ताले चाँडो भन्दा चाँडो आफ्नो शेयर किन्ने बेच्ने अवसर प्राप्त गर्ने थिए ।

पछिल्लो समय कागजी प्रक्रिया एकदमै कम भइसकेको हुँदा नेपालमा पनि आईपीओ बाँडफाँट र सूचीकरणको समयलाई छोट्याउनुपर्ने आवाज उठ्न थालेको छ । पछिल्लो समय अझै पनि शेयर सूचीकरण गर्न १ महिना हाराहारीमा समय लगाउने गरेको पछिल्लो तथ्यांकले देखाउँछ ।

सिटिजन्स लाइफ इन्स्योरेन्स कम्पनीले भदौ १५ देखि १९ गतेसम्म प्राथमिक शेयर निष्काशन गरेको थियो भने हाथवे इन्भेष्टमेन्ट नेपाल लिमिटेडले भदौ २१ गतेदेखि २५ गतेसम्म शेयर निष्काशन गरेको थियो । दुबै कम्पनीको शेयर बाँडफाँट भएको छैन । अहिले मिड साेलु हाइड्रोपावरको शेयर निष्काशन भइरहेको छ । कम्पनीले गत भदौ २९ गतेदेखि असोज २ गतेसम्म शेयर निष्काशन गरेको हो ।

comments powered by Disqus

नयाँ ब्रोकर कमिशन आजदेखि लागू हुने

May 14, 2024 09:07 AM

जेठ १ गते (आज) देखि नयाँ ब्रोकर कमिसन दर लागू हुँदैछ। नेपाल धितोपत्र बोर्डले धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ को अनुसूची १४ मा गरेको हेरफेर अनुसार आजदेखि नयाँ ब्रोकर कमिशन लागू हुने भएको हो।