आइतबार काठमाडौँको मनोहरा सुकुम्बासी बस्तीमा पुगेर सम्बोधन गर्दै उनले मेयर शाहविरुद्धको संघर्षमा सघाउने बताएका हुन्। महानगरले बस्ती खाली गर्न दिएको एक हप्ताको अल्टिमेटम सकिँदै गर्दा प्रसाईं सुकुम्बासीहरूको समर्थनमा खुलेका हुन्। साथै, उनले मंसिर ७ गतेदेखि सुरु हुने आफ्नो अभियानमा सबैलाई सहभागी हुन आह्वान गरे।
प्रसाईंले सुकुम्बासीहरूलाई धम्की दिने वा घर तोडफोडमा संलग्न हुने व्यक्तिहरूका घरपरिवारलाई पनि त्यस्तै व्यवहार गरिने चेतावनी दिए। उनले सम्पूर्ण राजनीतिक दल र मेयर बालेन शाहलाई “ठेगान लगाउने” चेतावनीसमेत दिए। यस क्रममा उनले बालेन शाहसँग मिलेर भिक्टर पौडेलले बब्लु गुप्तालाई मन्त्री बनाउन दुई करोड रुपैयाँ लिएको आरोपसमेत लगाए।
दलहरूले सुकुम्बासीहरूलाई भोट बैंकको रूपमा मात्र प्रयोग गरेको दाबी गर्दै प्रसाईंले आफूले भोट नमाग्ने तर सबैलाई पक्की घर बनाउन सहयोग गर्ने प्रतिबद्धता जनाए। महानगरको अल्टिमेटम सकिनै लाग्दा प्रसाईंको यो अभिव्यक्तिलाई बालेन शाहविरुद्धको नयाँ राजनीतिक मोर्चाबन्दीका रूपमा हेरिएको छ।
