विद्युत् उत्पादन कम्पनी लिमिटेडको स्वामित्वमा रहेको उक्त परियोजना सार्वजनिक-निजी साझेदारीअनुसार विकास गर्न ५१ प्रतिशत शेयर स्वामित्व लिन चाहने नेपाली नागरिक वा नेपाली कम्पनीसँग प्रस्ताव माग गरिएको थियो । प्रस्ताव पेश गर्ने अन्तिम दिन मंगलबारसम्म सीजी इनर्जी प्रालिले मात्र आवेदन दियो । अरु कुनै पनि कम्पनीले आवेदन दिएनन् ।
आयोजना निर्माणको लागि लगानी साझेदारीसम्बन्धी कार्यविधिमा एउटा मात्रै कम्पनीले प्रस्ताव पेश गरे पनि मान्य हुने व्यवस्था गरिएकोले अब इनर्जी साझेदारको रुपमा रहने निश्चित भएको विद्युत् उत्पादन कम्पनी स्रोतले मेरो लगानीलाई जानकारी दियो ।
सिजी इनर्जीलाई साझेदारको रुपमा कम्पनीमा भित्रयाउनु अगाडि त्यसको समग्र आर्थिक तथा वित्तीय प्रणालीको बारेमा अध्ययन हुनेछ । ‘कम्पनीले ५१ प्रतिशत शेयर म लिन्छु त भन्यो, त्यो अनुसार कम्पनीहरूको वित्तीय अवस्था र लगानीको सुनिश्चितता, आयोजना निर्माण गर्न उस्को क्षमता छ छैन भन्नको लागि कम्पनीको नेटवर्थ, अडिट रिपोर्ट र वार्षिक कारोबार विस्तृतरुपमा अध्ययन गरेपछि बल्ल अन्तिम निर्णय गरिनेछ,’ कम्पनीका एक अधिकारीले भने । सर्सती हेर्दा सिजी इनर्जी अस्वीकृत हुने सम्भावना भने निकै कम रहेको उनको भनाइ छ ।
स्मरणरहोस् यो परियोजना बनाउन भारतीय कम्पनी अडानी समूहले पनि चासो राखेको थियो । तर पछि सरकारले नै नेपाली लगानीमै बनाउने निर्णय गरेपछि निजी क्षेत्रलाई व्यावसायिक साझेदार बनाउने निर्णय गरेपछि प्रस्ताव आव्हान गरिएको थियो ।
आयोजना कर्णालीका कालीकोट, बाजुरा, मुगु, हुम्ला र जुम्ला गरी ५ जिल्लामा निर्माण हुनेछ ।
