उपाधि दाबेदार फ्रान्सले इराकमाथि ३–० को सहज जित निकाल्दै नकआउट चरणमा स्थान पक्का गरेको छ भने अर्को रोमाञ्चक खेलमा नर्वेले सेनेगललाई ३–२ ले पराजित गरेको छ।
अमेरिकाको फिलाडेल्फिया स्टेडियममा भएको खेलमा स्टार स्ट्राइकर किलियन एमबाप्पेको उत्कृष्ट प्रदर्शनको मद्दतले फ्रान्सले इराकलाई पराजित गर्यो। भारी वर्षा र चट्याङका कारण खेल झण्डै दुई घण्टा स्थगित भएर पुनः सुरु भएको थियो। खेलको १४औँ मिनेटमा माइकल ओलिसेको पासमा कप्तान किलियन एमबाप्पेले गोल गर्दै फ्रान्सलाई सुरुवाती अग्रता दिलाए। आफ्नो १००औँ अन्तर्राष्ट्रिय खेल खेलिरहेका एमबाप्पेको यो १५ औँ विश्वकप गोल थियो।
५४औँ मिनेटमा इराकी डिफेन्स र गोलकिपर अहमद बासिलको तालमेल नमिल्दा उसमान डेम्बेलेले बल खोसेर एमबाप्पेलाई पास दिए, जसमा एमबाप्पेले सहजै गोल गरे। यो गोलसँगै उनले विश्वकपमा १६ गोल गरेका मिरोस्लाभ क्लोजको कीर्तिमानसँग बराबरी गरे। ६६औँ मिनेटमा पुनः माइकल ओलिसेकै थ्रु–पासमा उसमान डेम्बेलेले उत्कृष्ट फिनिसिङ गर्दै फ्रान्सको ३–० को जित सुनिश्चित गरे।
त्यस्तै, न्युयोर्क न्युजर्सी स्टेडियममा भएको अर्को निकै प्रतिस्पर्धात्मक र रोमाञ्चक खेलमा स्टार फरवार्ड अर्लिङ हालान्ड चम्किएपछि नर्वेले अफ्रिकी शक्ति सेनेगललाई ३–२ ले स्तब्ध बनायो। खेलको ४३औँ मिनेटमा वैकल्पिक राइट–ब्याक मार्कुस होल्मग्रेन पेडेरसनले गोल गर्दै नर्वेलाई पहिलो हाफमा १–० को अग्रता दिलाएका थिए। दोस्रो हाफको सुरुवातमै हालान्डले गोल गर्दै नर्वेको अग्रता दोब्बर बनाए। ५३औँ मिनेटमा सेनेगलका इस्माइला सारले गोल फर्काए पनि त्यसको ५ मिनेटपछि हालान्डले व्यक्तिगत दोस्रो गोल गर्दै नर्वेलाई ३–१ को बलियो स्थितिमा पुर्याए।
खेलको इन्जुरी समयमा सेनेगलका इस्माइला सारले व्यक्तिगत दोस्रो गोल गरे पनि टोलीलाई हारबाट जोगाउन सकेनन् र नर्वेले खेल ३–२ ले आफ्नो पक्षमा पार्यो।
यस जितसँगै फ्रान्स समूह आई मा लगातार दुई जितका साथ ६ अंक जोड्दै अन्तिम ३२ मा प्रवेश गरिसकेको छ। नर्वेले पनि महत्वपूर्ण ३ अंक जोड्दै सन् १९९८ पछि पहिलो पटक विश्वकपको नकआउट चरणमा पुग्ने सम्भावनालाई निकै बलियो बनाएको छ। इराक र सेनेगलले भने अर्को चरणमा पुग्नका लागि समूहको अन्तिम खेलमा ‘गर या मर’ को अवस्थामा प्रतिस्पर्धा गर्नुपर्नेछ।
