कम्पनीले खुला प्रतिस्पर्धाबाट सक्षम तथा अनुभवी व्यावसायिक नेतृत्व चयन गर्दै संस्थागत सुशासन बलियो बनाउने कसरत थालेको हो।
यसअघि कम्पनीका तत्कालीन प्रमुख कार्यकारी अधिकृत मनोजकुमार लाल कर्णको कार्यशैली, कर्मचारी तथा अभिकर्ताहरूसँगको द्वन्द्व र विभिन्न आन्तरिक अनियमितताका कारण तीव्र असन्तुष्टि चर्किएपछि उनले पदबाट राजीनामा दिनुपरेको थियो। कम्पनीका तत्कालीन अध्यक्ष र प्रमुख कार्यकारी अधिकृतलगायतका उच्च पदस्थ व्यक्तिहरूले आम बीमितहरूको जीवन बीमा कोष (Life Insurance Fund) को रकमको गम्भीर दुरुपयोग गरेको अनुसन्धानबाट खुलेको थियो। विशेषगरी, बजार मूल्य कृत्रिम रूपमा प्रभावित पार्ने उद्देश्यले विभिन्न संगठित कारोबारमा संस्थागत रकमको चरम दुरुपयोग गरिएको र त्यसमा हिमालयन लाइफ इन्स्योरेन्स स्वयं मुख्य खरिदकर्ता तथा बिक्रीकर्ताको रूपमा प्रयोग भएको अनुसन्धान प्रतिवेदनहरूले औँल्याएका छन्।
यसैबीच, संस्थागत लगानी, शेयर कारोबार तथा संस्थापक सेयर र एनआरआइसीको सेयर खरिद प्रक्रियामा नियमविपरीतका गतिविधि र सम्पत्ति शुद्धीकरणसम्बन्धी अनुसन्धानले बीमा क्षेत्र तातेको छ। हिमालयन लाइफसँग प्रत्यक्ष वा अप्रत्यक्ष रूपमा जोडिएका वित्तीय तथा संस्थागत निर्णयहरू अनुसन्धानको दायरामा आएपछि कम्पनीको साखमा गम्भीर धक्का लागेको थियो। शेयर बजारको चलखेल र संस्थागत लगानी व्यक्तिगत स्वार्थका लागि प्रयोग भएको पाइएपछि नियामक निकाय र नेपाल प्रहरीको केन्द्रीय अनुसन्धान ब्युरो (CIB) ले समेत यस विषयमा कडा कदम चालेका थिए। अभिकर्ता र कर्मचारीहरूको लामो आन्दोलन तथा घेराउका कारण उत्पन्न असहज परिस्थितिका बीच तत्कालीन सीईओ बाहिरिएसँगै कम्पनीमा नेतृत्व संकट गहिरिएको थियो। त्यसयता अस्थायी व्यवस्थापनको भरमा चलिरहेको कम्पनीले अहिले खस्किएको साख पुनर्स्थापना गर्न र नियामकको निगरानीबीच स्थायी रूपमा नयाँ सीईओ नियुक्तिको प्रक्रिया अगाडि बढाएको हो।
कम्पनीले जारी गरेको नयाँ सूचनाअनुसार आगामी अगस्ट २६ भित्र इच्छुक उम्मेदवारहरूले आवेदन पेस गरिसक्नुपर्नेछ। सीईओ बन्नका लागि उम्मेदवारसँग जीवन बीमा क्षेत्रमा कम्तीमा ५ वर्षको नायब प्रमुख कार्यकारी अधिकृत (डीसीइओ) वा सीइओको उच्च तहको अनुभव हुनुपर्ने अनिवार्य सर्त राखिएको छ। साथै, नेपाल बीमा प्राधिकरणको निर्देशिका बमोजिम 'फिट एन्ड प्रपर' का मापदण्डहरू पालना गर्दै संकटग्रस्त बनेको संस्थालाई दीर्घकालीन रूपमा मुनाफा, पारदर्शिता र सुशासनतर्फ डोर्याउन सक्ने विस्तृत बिजनेस प्लान समेत पेस गर्न भनिएको छ।
विभिन्न कानुनी, सेयर बजारसँग जोडिएका विवाद र व्यवस्थापकीय उथलपुथल पार गर्दै आएको यस इन्स्योरेन्सले आगामी दिनमा कस्तो र कत्तिको प्रभावकारी व्यावसायिक नेतृत्व चयन गर्छ र बिग्रिएको सुशासनको पाटोलाई कसरी सम्हाल्छ भन्नेबारे बीमा क्षेत्रमा अहिले विशेष चासोका साथ हेरिएको छ।
