कम्पनीले वार्षिकोत्सवको अवसरमा तीन प्रमुख कार्यक्रम आयोजना गरेको जनाएको छ।

रुसुवा बाढीपीडितका लागि १० लाख रुपैयाँ सहयोग

हालै रुसुवा जिल्लामा आएको विनाशकारी बाढीबाट प्रभावित नागरिकको संकटका बेला उद्धार, राहत तथा पुनर्स्थापनामा सहयोग पुर्‍याउने उद्देश्यले कम्पनीले ‘प्रधानमन्त्री दैवी प्रकोप उद्धार कोष’मा १० लाख रुपैयाँ जम्मा गरेको छ। राष्ट्रिय विपद्का कारण प्रभावित समुदायको पुनर्स्थापनाका लागि उक्त रकम हस्तान्तरण गरिएको कम्पनीले जनाएको छ।

बाढी प्रभावित क्षेत्रका लगानीकर्ताले आवश्यक रकम जुटाउन कम्पनीमार्फत शेयर बिक्री गरेको अवस्थामा सेटलमेन्ट साइकल कुर्नु नपर्ने गरी तत्काल रकम भुक्तानी गर्ने व्यवस्था समेत गरिएको कम्पनीले जनाएको छ।

कम्पनीले नेपाल रेडक्रस सोसाइटीको प्राविधिक सहयोगमा आफ्नो केन्द्रीय कार्यालय परिसरमा बृहत् रक्तदान कार्यक्रम आयोजना गरेको थियो। कार्यक्रममा कम्पनीका सञ्चालक, कर्मचारी, सक्रिय लगानीकर्ता तथा स्थानीय महानुभावहरूको उत्साहजनक सहभागिता रहेको थियो।

त्यस्तै, नयाँ तथा विद्यमान लगानीकर्तालाई पूँजी बजारबारे दक्ष र सचेत बनाउने उद्देश्यले एकदिने पूँजी बजार साक्षरता कार्यक्रम समेत सञ्चालन गरिएको थियो।

कार्यक्रममा नेपाली पूँजी बजारमा विद्यमान अवसर तथा चुनौती, धितोपत्रको आधारभूत विश्लेषण, सूचीकृत कम्पनीहरूको वित्तीय विवरण विश्लेषण तथा पोर्टफोलियो विविधीकरण कसरी गर्ने भन्ने विषयमा व्यावहारिक ज्ञान प्रदान गरिएको कम्पनीले जनाएको छ।

वार्षिकोत्सवकै अवसरमा कम्पनीले निरन्तर १० वर्ष सेवा पुर्‍याएका कर्मचारीहरूलाई विशेष सम्मान समेत गरेको छ।

दक्षिणकाली इन्भेष्टमेन्ट एण्ड सेक्युरिटिज प्रा.लि. नेपाल धितोपत्र बोर्डबाट अनुमतिप्राप्त स्टक ब्रोकर नं. ३३, नेपाल स्टक एक्सचेन्जको सदस्य तथा सीडीएस एण्ड क्लियरिङ लिमिटेडअन्तर्गत दर्ता भएको डिपीका रूपमा कार्यरत छ। कम्पनीको केन्द्रीय कार्यालय काठमाडौंको कमलादीमा रहेको छ भने बुटवल र टाँडीमा शाखा कार्यालयमार्फत धितोपत्र कारोबार तथा डिपीसम्बन्धी सेवा प्रदान गर्दै आएको छ।