बाढीले आयोजनाका क्याम्प क्षेत्र, निर्माण उपकरण, बेलिब्रिज, पहुँच सडक तथा आयोजनास्थलसम्म पुग्ने पुलमा क्षति पुर्याएको प्रारम्भिक विवरण सार्वजनिक भएको छ। बाढीबाट ३४१ मेगावाट क्षमताको बूढीगण्डकी जलविद्युत् आयोजना सबैभन्दा बढी प्रभावित भएको देखिएको छ। टाइम्स इनर्जी प्रालिले प्रवर्द्धन गरिरहेको उक्त आयोजनाको मुख्य क्याम्प क्षेत्र बाढीले बगाएको छ। क्याम्प क्षेत्रमा रहेका केही निर्माण उपकरणसमेत बगाएको प्रारम्भिक विवरणमा उल्लेख छ।
त्यस्तै, २४.५ मेगावाट क्षमताको दोभान खोला जलविद्युत् आयोजनामा पनि बाढीले क्षति पुर्याएको छ। दोभान खोला हाइड्रोपावर लिमिटेडले प्रवर्द्धन गरिरहेको आयोजनाको क्याम्प क्षेत्रका केही घरमा क्षति पुगेको छ भने आयोजनास्थलमा आवागमनका लागि प्रयोग हुँदै आएको बेलिब्रिजसमेत बाढीले बगाएको छ।
३०.९१ मेगावाट क्षमताको यारु खोला जलविद्युत् आयोजना पनि बाढीको चपेटामा परेको छ। यारु हाइड्रो पावर प्रालिले प्रवर्द्धन गरिरहेको उक्त आयोजनाको बेलिब्रिजमा क्षति पुगेको छ। साथै, निर्माणमा प्रयोग हुने सामग्री तथा उपकरणसमेत बाढीले बगाएको विवरणमा उल्लेख छ। यसैगरी, १६ मेगावाट क्षमताको माछा खोला जलविद्युत् आयोजनाको पहुँच सडक र आयोजनास्थल पुग्ने पुलमा क्षति पुगेको छ। वाटर इनर्जी डेभलपमेन्ट प्रालिले प्रवर्द्धन गरिरहेको उक्त आयोजनामा भएको क्षतिले निर्माण कार्यसँगै आयोजनास्थलसम्मको आवागमनसमेत प्रभावित हुने देखिएको छ।
बाढीबाट चारवटै आयोजनामा भएको क्षतिको विवरण प्रारम्भिक रहेको छ। क्षतिको विस्तृत मूल्याङ्कन भइनसकेकाले कुल आर्थिक क्षति कति भयो भन्ने स्पष्ट भइसकेको छैन। त्यस्तै, क्षतिग्रस्त संरचनाको पुनर्निर्माण, निर्माण कार्यमा पर्ने असर र आयोजनाहरूको काम पुनः नियमित हुन लाग्ने समयबारे पनि यकिन विवरण सार्वजनिक भएको छैन।
बाढीले जलविद्युत् आयोजनाका भौतिक संरचनासँगै निर्माणमा प्रयोग हुने उपकरण र पहुँच पूर्वाधारमा समेत क्षति पुर्याएकाले आयोजनाहरूको निर्माण तालिकामा असर पर्न सक्ने देखिएको छ। यद्यपि, क्षतिको पूर्ण विवरण र निर्माण कार्यमा पर्ने वास्तविक प्रभाव भने विस्तृत मूल्याङ्कनपछि मात्रै स्पष्ट हुनेछ।
