हालै रसुवा लगायतका विभिन्न जिल्लाहरूमा आएको प्राकृतिक विपदबाट प्रभावित भई धेरै ग्राहकले चेक, एटीएम कार्ड, मोबाइल फोन तथा अन्य परिचय खुल्ने कागजातहरू गुमाएका छन्। यस्तो विषम परिस्थितिमा सर्वसाधारणलाई बैंकिङ कारोबार गर्न समस्या नहोस् भन्ने उद्देश्यले राष्ट्र बैंकले यस्तो सहजीकरण गरेको हो।
राष्ट्र बैंकको बैंक तथा वित्तीय संस्था नियमन विभागले क, ख, ग र घ वर्गका सबै बैंक तथा वित्तीय संस्थाहरूलाई पत्राचार गर्दै ग्राहकको पहिचानका लागि लचकता अपनाउन निर्देशन दिएको छ। ग्राहकले आफ्नो चेक वा कार्ड गुमाएको भए तापनि बैंकमा पहिले नै रहेको हस्ताक्षरको नमुना, ग्राहकको फोटो, र संस्थामा उपलब्ध अन्य व्यक्तिगत विवरणहरूको आधारमा ग्राहकको पहिचान यकीन गरी सेवा प्रदान गर्नुपर्ने छ।
