नेपाल धितोपत्र बोर्डले पहिलो पटक धितोपत्र बजारमा खुलामुखी सामुहिक लगानी योजना संचालनमा ल्याउने भएको छ । बोर्डले आर्थिक वर्ष २०७५/७६ को नीति तथा कार्यक्रमको सामूहिक लगानी कोष अन्र्तगत यस्तो योजना संचालनमा ल्याउने भएको हो ।

बोर्डका अनुसार एक योजना व्यवस्थापकलाई प्रयोगात्मकरुपमा प्रारम्भिक आकार ५० करोड रुपैयाँ रहने गरी पहिलो खुलामुखी सामूहिक लगानी योजना संचालन गर्न एनआईबिएल सहभागिता फण्डलाई अनुमति दिईसकेको छ ।

यसमा पहिलो चरणमा १२ करोड ५० लाख बराबरको ईकाइहरु सार्वजनिक निष्काशनको माध्यमबाट बिक्री खुल्ला हुने बोर्डले जनाएको छ । 

सामूहिक लगानी कोष नियमावली लागू भए यता बोर्डले हालसम्म करिव १६ अर्व रुपैयाँ बराबरको १७ वटा बन्दमुखी योजनाहरु मात्रै संचालनमा रहेको छ

खुलामुखी योजना, बन्दमुखी योजना जस्तो नेप्सेमा सूचीकरण नहुने र धितोपत्र दलालमार्फत कारोवार नहुने जनाएको छ । योजनाको खुद सम्पत्ति मूल्यको आधारमा योजना व्यवस्थापकले नै योजनाको इकाईको खरीद बिक्री सुविधा उपलब्ध गराउने हुँदा लगानीकर्ताहरुले चाहेको बखत सहजै इकाई खरीदबिक्री गर्न सक्ने व्यवस्था रहेको बोर्डले जनाएको छ ।

बन्दमुखी योजना जस्तै खुलामुखी योजनाको प्रति इकाई मूल्य १० रुपैयाँ हुने र न्यूनतम १००० रुपैयाँ सम्ममा इकाई खरीद गर्न सकिनेछ । खुलामुखी योजना निश्चित अवधिमा परिपक्व हुने नभई निरन्तर संचालनमा रहनेछ ।

लगानीकर्ताहरुले ईकाइ खरिद गर्दा कुनै शुल्क नलाग्ने बोर्डले जनाएको छ । लगानीकर्ताहरुको माग अनुसार योजनाको आकार बृद्धि गर्न सकिने र नयाँ योजना समेत ल्याउन सकिने बोर्डको दाबी छ ।

खुलामुखी योजनाको प्रवेशसँगै लगानीकर्ताहरुलाई लगानीका लागि नयाँ वित्तीय औजार उपलब्ध हुने र यसबाट लगानीकर्ताहरुले लगानी विविधीकरण गर्न सहयोग पुग्नुकासाथै धितोपत्रबजारमा नयाँ आयाम थप हुने र हाल अन्य खुलामुखी योजना समेत आउने क्रममा रहेकोेमा यसबाट बजारको दायरा फराकिलो हुन सहयोग पुग्ने बोर्डले विश्वास छ ।