पुस मसान्तसम्ममा लघुवित्तले २ करोड ६५ लाख रुपैयाँ खुद नाफा आर्जन गरेको छ। यो गत आर्थिक वर्षको सोही अवधिको तुलनामा १५२.३० प्रतिशत बढी हो। गत आर्थिक वर्षको पुस मसान्तसम्ममा लघुवित्तले १ करोड ५ लाख खुद नाफा कमाएको थियो।
सो अवधिसम्ममा लघुवित्तले ५९ करोड ५१ लाख निक्षेप र ९७ करोड १५ लाख सापटीबाट १ अर्ब ७१ करोड ५६ लाख रुपैयाँ कर्जा प्रवाह गरेको छ। यसबापत लघुवित्तले ७ करोड १५ लाख रुपैयाँ खुद ब्याज आम्दानी गरेको छ। जुन गत आर्थिक वर्षको यसै अवधिको तुलनामा ३ करोड ३३ लाख बढी हो। त्यसैगरी, समीक्षा अवधिमा लघुवित्तको सञ्चालन मुनाफा २ करोड ५१ लाख रुपैयाँ बढेर ४ करोड १६ लाख पुगेको छ।
५७ वटा शाखा कार्यालयबाट सेवा दिँदै आइरहेको यस लघुवित्तको चुक्ता पूँजी पुस मसान्तसम्ममा १९ करोड ९० लाख रहेको छ। त्यसैगरी, लघुवित्तको जगेडा कोषमा ५ करोड ६५ लाख रुपैयाँ सञ्चित छ।
सो अवधिसम्ममा लघुवित्तको वार्षिक प्रतिशेयर आम्दानी २६ रुपैयाँ ६६ पैसा कायम भएको छ भने प्रतिशेयर नेटवर्थ १२८ रुपैयाँ ४१ पैसा कायम रहेको छ। लघुवित्तको मूल्य आम्दानी अनुपात १६.२७ गुणा रहेको छ। सो अवधिसम्ममा लघुवित्तको निष्क्रिय कर्जा बढेर १.२४ प्रतिशत पुगेको छ।
चौतारी र आरम्भ लघुवित्त एक बराबर एक शेयर आदान प्रदान अनुपातमा मर्ज हुँदैछन्। यी दुबै लघुवित्तले साधारण सभाबाट सो प्रस्ताव पारित गरिसकेका छन्। मर्जपश्चात आरम्भ चौतारी लघुवित्त वित्तीय संस्थाको नामबाट एकीकृत कारोबार हुनेछ।
