गत वर्षको यसै अवधिमा लघुवित्तले एक करोड २५ लाख रुपैयाँ खुद नाफा आर्जन गरेको थियो। समीक्षा अवधिमा लघुवित्तको निष्क्रिय कर्जा बढेपछि सम्भावित जोखिम बापतको व्यवस्थामा बढी रकम छुट्याउनु पर्दा खुद नाफा घटेको हो।
पुस मसान्तसम्ममा ४ करोड ८० लाख रुपैयाँ खुद ब्याज आम्दानी गर्न सफल यस लघुवित्तले २ करोड ९ लाख रुपैयाँ सम्भावित जोखिम बापतको व्यवस्थाका लागि छुट्याएको छ। गत आर्थिक वर्षको सोही अवधिको तुलनामा लघुवित्तको खुद ब्याज आम्दानी १ करोड १२ लाख रुपैयाँ बढेपनि सो व्यवस्थाका कारण सञ्चालन मुनाफा ७८ लाख ७२ हजार रुपैयाँ घटेर ७२ लाख ३० हजार रुपैयाँमा सीमित भएको हो।
चुक्ता पूँजी १३ करोड ३१ लाख रुपैयाँ रहेको लघुवित्तको जगेडा कोषमा तीन करोड ३० लाख रुपैयाँ सञ्चित छ।
दोस्रो त्रैमाससम्ममा ३५ करोड ७८ लाख रुपैयाँ निक्षेप संकलन गरेको लघुवित्तले ८२ करोड ४० लाख रुपैयाँ अन्य बैंक तथा वित्तीय संस्था मार्फत ऋण लिएर एक अर्ब २९ करोड ७० लाख कर्जा लगानी गरेको छ। सो अवधिसम्ममा लघुवित्तको निष्कृय कर्जा अनुपातमा वृद्धि भएको छ। गत आवको सोही अवधिमा २.३३ प्रतिशत रहेको लघुवित्तको निष्कृय कर्जा अनुपात १.१५ प्रतिशत बिन्दुले बढेर ३.४८ प्रतिशतमा पुगेको छ ।
प्रकाशित वित्तीय विवरण अनुसार लघुवित्तको वार्षिक प्रतिशेयर आम्दानी १६ रुपैयाँ ८९ पैसा छ। लघुवित्तको प्रतिशेयर नेटवर्थ १३७ छ भने मूल्य आम्दानी अनुपात ४२.०९ गुणा छ।
