गत साता १ प्रतिशतभन्दा बढी घटेको नेप्से, यस साता के होला?

Aug 13, 2023 06:45 AM Merolagani

गत साता नेप्से परिसूचक १ प्रतिशतभन्दा बढी घटेर बन्द भएको छ। अघिल्लो साताको अन्तिम कारोबार दिन २०८९.८४ विन्दुमा बन्द भएको नेप्से, गत साता १.१४ प्रतिशत अर्थात २३.७९ अंक घटेर २०६६.०५ विन्दुमा झरेको छ।

गत साता ५ कारोबार दिनमध्ये ३ कारोबार दिन नेप्से बढेर बन्द भएको थियो भने २ कारोबार दिन घटेर बन्द भएको थियो। सो साताको पहिलो ३ कारोबार दिन नेप्से बढेको थियो भने बाँकी दुई कारोबार दिन घटेको थियो।

मनोवैज्ञानिक टेवा विन्दुबाट फर्कियो

गत साता नेप्से परिसूचक २००० को मनोवैज्ञानिक टेवा विन्दुलाई छोएर फर्किएको छ। गत साताको बुधबारको कारोबार अवधिमा नेप्सेले सो विन्दुमा छोएको थियो। यस साता नेप्से परिसूचक उकालो लागेमा २०९० देखि २१२० सम्मको क्षेत्रमा प्रतिरोधको सामना गर्ने देखिन्छ। त्यसैगरी, यस साता नेप्से ओरालो लागेमा १९६० देखि १९९० को क्षेत्रमा टेवा पाउने देखिन्छ।

कमजोर भोल्युम

गत साता नेप्से परिसूचकसँगै भोल्यूम पनि घटेको छ। गत साता नेप्सेमा दैनिक औषतमा २ अर्ब १६ करोडको शेयर कारोबार भएको छ। साताको अन्तिम कारोबार दिन नेप्सेको २० दिने औषत भोल्यूम २ अर्ब ५५ करोड थियो। २० दिने औषत भोल्यूमको तुलनामा गत साताको दैनिक औषत भोल्यूम १५.२९ प्रतिशत कम हो।

बियरिश प्रवृत्ति

गत साता नेप्सेको एमएसिडी रेखा सिग्नल रेखा र शून्य रेखा दुबैभन्दा तल रहेको छ। त्यसैगरी, नेप्सेको हिस्टोग्राम पनि नकारात्मक क्षेत्रमा रहेको छ। यसले हाल नेप्से बियरिश प्रवृत्तिमा रहेको संकेत गर्दछ।