यस साता नेप्से परिसूचक २ प्रतिशत घटेर बन्द भएको छ। गत साता २११२.२९ विन्दुमा बन्द भएको नेप्से, यस साता २.०८ प्रतिशत अर्थात ४३.९८ अंक घटेर २०६८.३१ विन्दुमा झरेको छ।

यस साता ४ कारोबार दिनका लागि बजार खुलेको थियो। जसमध्ये एक कारोबार दिन नेप्से बढेको थियो भने तीन कारोबार दिन घटेको थियो। यस साताको बुधबार नेप्से परिसूचक सामान्य अंक बढेर बन्द भएको थियो।

यस साता सेन्सेटिभ इण्डेक्स २.४४ प्रतिशत घटेको छ भने फ्लोट इण्डेक्स २.२० प्रतिशत र सेन्सेटिभ फ्लोट इण्डेक्स २.६३ प्रतिशत घटेको छ।

नेप्सेसँगै यस साता दैनिक औषत कारोबार रकम पनि घटेको छ। गत साता दैनिक औषतमा ५ अर्ब ७१ करोडको शेयर खरिदबिक्री भएको बजारमा यस साता दैनिक औषतमा ४ अर्ब २० करोडको शेयर कारोबार भएको छ। गत साताको तुलनामा यस साताको दैनिक औषत कारोबार रकम २६.४९ प्रतिशत घटेको हो। त्यस्तै, यस साता नेप्सेको दैनिक औषत शेयर संख्या २२.०९ प्रतिशत घटेको छ भने दैनिक औषत कारोबार संख्या २१.३१ प्रतिशत घटेको छ।

यस साता नेप्सेको कुल बजार पूँजीकरण पनि २ प्रतिशत घटेको छ। गत साताको अन्तिम कारोबार दिन ३३ खर्ब ४९ अर्ब रुपैयाँ रहेको नेप्सेको कुल बजार पूँजीकरण, यस साता ६९ अर्ब घटेर ३२ खर्ब ७९ अर्बमा झरेको छ।

१३ उपसमूहमध्ये यस साता वित्त उपसमूहबाहेक अरु सबै उपसमूहको परिसूचक घटेको छ। यस साता वित्त उपसमूहको परिसूचक २.६४ प्रतिशत बढेको छ। गत साता २२८०.५६ विन्दुमा बन्द भएको यस उपसमूहको परिसूचक, यस साता ६०.२० अंक बढेर २३४०.७६ विन्दुमा पुगेको छ।

यस साता विकास बैंक उपसमूहको परिसूचक सर्वाधिक ३.०३ प्रतिशत घटेको छ। अंकका आधारमा भने यस साता जीवन बीमा उपसमूहको परिसूचक सर्वाधिक २३२.९७ अंक घटेको छ।

यस साता आत्मनिर्भर लघुवित्त वित्तीय संस्थाको ६२ हजार ३३८ कित्ता बोनस शेयर नेप्सेमा सूचीकृत भएको छ।

यस साता नेपाल फाइनान्सको शेयरमूल्य सर्वाधिक २६.५२ प्रतिशत बढेको छ। त्यस्तै, यस साता समाज लघुवित्त वित्तीय संस्थाको शेयरमूल्य करिब १४ प्रतिशत बढेको छ भने माण्डु हाइड्रोपावरको शेयरमूल्य करिब १२ प्रतिशत बढेको छ। कारोबारमा आएको भगवती हाइड्रोपावरको शेयरमूल्य यस साता सर्वाधिक १६ प्रतिशत घटेको छ। त्यसैगरी, यस साता मनकामना स्मार्ट लघुवित्तको शेयरमूल्य १५.७६ प्रतिशत घटेको छ।

फ्लोरसिट विश्लेषण गर्दा यस साता रसुवागढी हाइड्रोपावर, विजय लघुवित्त, नेपाल फाइनान्स लगायतका स्टकहरु मोस्ट पपुलर बाइ स्टक सूचीको शीर्ष स्थानमा रहेका छन् भने भगवती हाइडोपावर डेभलपमेन्ट कम्पनी, नेपाल दूरसञ्चार कम्पनी, ग्रिनलाइफ हाइड्रोपावर लगायतका स्टक मोस्ट पपुलर सेल स्टक सूचीको शीर्ष स्थानमा रहेका छन्।