आर्थिक वर्षको अन्त्य नजिकिदैं गर्दा बजेट ‘फ्रिज हुन नदिने’ भन्दै ‘लुम्बिनी प्रदेश सभाको अनुगमनको लागि’ हिंडेको प्रदेश सांसदहरुको टोली लुम्बिनी नगई भारतको नैनीतालमा मस्ती गरिरहेको तथ्य सार्वजनिक भएपछि खैलाबैला मच्चिएको छ । 

संघीय तथा प्रदेश लेखा समिति सरकारले गर्ने आर्थिक अनियमितताहरुको छानबिन गरि कारवाही सिफारिस गर्ने अधिकार सम्पन्न निकाय हो । तर,त्यति निकायका पदाधिकारीहरु एकातिरको अनुगमन, भ्रमण आदेश स्वीकृति गराएर अर्काेतिर गएपछि खैलाबैला मच्चिएको हो ।

तस्वीर:  दिनेश खवरबाट

समितिका सभापति अक्कलबहादुर रावलको नेतृत्वमा सदस्यहरू सन्तोष शर्मा थापा, बेल बहादुर राना,मधु भारती, मानबहादुर धामी, गीतादेवी माल र विक्रम सिंह धामी नैनी ताल पुगेका छन् । भ्रमणमा समितिका सचिव बलदेव कपाडी पनि सहभागी छन्। तर, सुदूरपश्चिम प्रदेश सभाका सचिव देव बहादुर बोगटीले सार्वजनिक लेखा समितिको टोली लुम्बिनी भ्रमणमा गएको बताए।

प्रदेश सभाको लेखा समितिले असार ३ गते लुम्बिनी प्रदेशको भ्रमण गर्ने निर्णय गर्दै प्रदेश सभामुख भीमबहादुर भण्डारीबाट अनुमति माग गरेको थियो । लुम्बिनी प्रदेश सभाको अनुभव सिक्न र लुम्बिनी प्रदेश सरकारका काम कारवाही अनुगमन गर्न भन्दै माग गरेपछि सभामुख भण्डारीले स्वीकृति लिएको थियो । तर, उनीहरू लुम्बिनीमा नगई भारतको नैनी ताल पुगेका हुन् ।

जबकी उनीहरूले भारत भ्रमणका लागि कुनै औपचारिक स्वीकृत नै लिएका छैनन् । प्रदेश सभा सचिवालयले लेखा समितिका सदस्यहरूले लुम्बिनी प्रदेश सभाको अनुभवन र उक्त क्षेत्रका पर्यटकीय क्षेत्रहरूको भ्रमणका लागि स्वीकृत लिए पनि भारतको नैनी ताल भ्रमणका विषयमा जानकारी नरहेको बताएको छ । ‘बाटोमा परेको ठाउँ हुन्थ्यो भने जान लागेको ठाउँको बाटोमा थियो, त्यसैले घुमे होलान् भन्न हुन्थ्यो । तर, यो त ठवाक्कै उल्टो दिशामा पर्छ । त्यसमाथि विदेश । त्यसैले सांसदहरुको यो भ्रमण नियोजितरुपमा भ्रष्टाचार प्रेरित घटना हो । सुदूरपश्चिम प्रदेश सभाको लागि मात्र नभएर देशकै लागि लज्जाको विषय हो । प्रदेश सभाको औचित्यमाथि प्रश्न उठिरहेको बेला प्रदेश सांसदहरुको यस्तो व्यवहारले संघियता विरोधीहरुलाई थप बल पुगेको छ,’ सुदूर पश्चिम प्रदेश सभाका एक सांसदले मेरो लगानीसँग भने । उनले यो विषय अब प्रदेश सभामा जोडतोडका साथ उठ्ने दावी पनि गरे ।

यो विषयमा आफूलाई समेत झुक्काइएको भन्दै प्रदेश सभामुख भण्डारी पनि सांसदहरुसँग आक्रोशित भएका छन् ।