जिल्ला आपतकालीन कार्यसञ्चालन केन्द्र काठमाडौंले सार्वजनिक गरेको पछिल्लो विवरण अनुसार, त्रिवि शिक्षण अस्पताल, राष्ट्रिय ट्रमा सेन्टर, र नेपाल मेडिकल कलेज लगायतका अस्पतालमा उपचाररत धेरैजसो घाइतेहरू असोज १२ गतेदेखि नै डिस्चार्ज हुन थालेका हुन् । विशेष गरी त्रिवि शिक्षण अस्पतालमा भर्ना भएका रसुवाका घाइतेहरूको स्वास्थ्यमा द्रुत सुधार देखिएको छ ।
बाढी र पहिरोको चपेटामा परेकाको सूचीमा कृषक, विद्यार्थी, सवारी चालक र गृहणीहरूका साथै ड्युटीमा रहेका सुरक्षाकर्मीहरू समेत रहेका छन् । बाढी आएलगत्तै उनीहरूलाई नुवाकोट र रसुवाका विभिन्न स्थानबाट हेलिकप्टर र एम्बुलेन्स मार्फत उद्धार गरी काठमाडौं ल्याइएको थियो ।
सुरक्षाकर्मीतर्फ घाइते भएका नेपाल प्रहरी र सशस्त्र प्रहरीका जवानहरूमध्ये केहीको अवस्था अझै अस्पतालमा सामान्य उपचारको क्रममा रहेको छ भने कतिपय डिस्चार्ज भइसकेका छन् । जिल्ला आपतकालीन कार्यसञ्चालन केन्द्रका अनुसार घाइतेहरूको पहिचान र स्वास्थ्य अवस्थाको विस्तृत विवरण सम्बन्धित निकायलाई उपलब्ध गराइसकिएको छ ।
