उद्धार टोलीले अहिले आयोजनाको केबल आउटलेट टनेलबाट सुरुङभित्र प्रवेश गर्ने प्रयास गरिरहेको छ।
उद्धार कार्यका लागि नेपाल विद्युत् प्राधिकरणका विज्ञ प्राविधिकसहित नेपाली सेना, सशस्त्र प्रहरी बल र नेपाल प्रहरीको संयुक्त टोली घटनास्थलमा खटिएको छ। सुरुङको प्रवेशद्वारमा रहेका भौतिक संरचना र अवरोधहरू हटाउने काम भइरहेको प्राधिकरणले जनाएको छ।
एक्साभेटरको प्रयोग गरी ‘क्राउन’ फुटाइँदै
उद्धार टोलीले सुरुङको माथिल्लो भाग अर्थात् ‘क्राउन’ फेला पारेको छ। अहिले एक्साभेटरको प्रयोग गरेर उक्त क्राउनलाई फुटाउने र भित्र पस्ने बाटो खुलाउने कार्य भइरहेको छ। सुरुङभित्र सुरक्षित रूपमा प्रवेश गर्ने अवस्था सिर्जना हुनासाथ उद्धारकर्ताहरूलाई भित्र पठाइने तयारी गरिएको छ।
यसअघि रसुवा र नुवाकोटका विभिन्न आयोजनाका सुरुङमा सयौँ मजदुरहरू फसेको र सम्पर्कविहीन भएको खबरले त्रास फैलाएको थियो। त्रिशूली–३ ‘ए’ मा भइरहेको यो पछिल्लो प्रगतिले सुरुङभित्र रहेकाहरूको अवस्था पत्ता लगाउन र उनीहरूको उद्धार गर्न ठूलो मद्दत पुग्ने अपेक्षा गरिएको छ।
उद्धार टोलीले युद्धस्तरमा काम गरिरहेको र मौसमले साथ दिएमा छिट्टै सुरुङभित्रको वास्तविक अवस्था पत्ता लाग्ने सुरक्षा स्रोतले जनाएको छ। थप विवरणहरू आउन बाँकी छ।
