यद्यपी बोर्डले अझै पनि नयाँ स्टक एक्सचेञ्ज ल्याउन दिने कि नदिने भन्ने निर्णय गरिसकेको छैन । धितोपत्र बोर्डले नयाँ स्टक एक्सचेञ्ज स्थापना गर्नका लागि अर्थ मन्त्रालयलाई पत्राचार गरेसँगै यो विषय एकाएक चर्चामा आएको थियो । बोर्डले
गत कात्तिकमा नयाँ स्टक एक्सचेन्ज सञ्चालन गर्न स्वीकृति माग गर्दै अर्थ मन्त्रालयलाई पत्राचार गरेको थियो ।
बोर्डको उक्त प्रस्तावमा आफैं निर्णय गर्नका लागि अर्थले बाटो खुल्ला गरेको अर्थमन्त्रालय स्रोतले मेरोलगानीलाई जानकारी दियो । स्रोतले मेरोलगानीसँगको कुराकानीमा भन्यो, ‘धितोपत्र सम्बन्धि सबै निर्णय गर्ने व्यवस्था ऐनमा उल्लेख भैसकेको छ । सोही व्यवस्था अनुसार निर्णयमा गर्न मन्त्रालयले बोर्डसँग आग्रह गरेको हो ।’
धितोपत्र सम्बन्धि ऐन २०६३ ले पूँजी बजारका सम्बन्धमा निर्णय गर्ने व्यवस्था गरेको छ ।
धितोपत्र बोर्डले भने सञ्चालक समितिको बैठकबाट थप निर्णय गर्ने बताएको छ । बोर्डका सहायक प्रवक्ता निरञ्जन घिमिरेले मेरोलगानीसँग भने, ‘मन्त्रालयबाट जवाफ आए पछि नयाँ स्टक खोल्ने सम्बन्धमा बोर्डले अर्को निर्णय गर्नेछ ।’
