भेण्डर कम्पनीको टीएमएस प्रणालीको राउटर अर्थात फायरवालमा आएको समस्याले लगानीकर्ता शेयर कारोबारबाट बञ्चित हुनु परेको नेप्सेका एक अधिकारीले मेरोलगानीलाई बताए ।
अनलाइन कारोबार प्रणाली सुरु गर्ने समयमा शेयर दलालहरुलाई डाटा सेन्टर राख्नका लागि भनिएकोमा आफैंले प्रणाली नराखी भेण्डर कम्पनीको सहयाता लिएका कारण अहिलेको समस्या आएको नेप्सेले बताएको छ ।
नेप्सेका ति अधिकारीले भने, ब्रोकरहरुको आफ्नै प्रणालीमा समस्या आएका कारण सबै ब्रोकरहरु अनलाइन प्रणालीमा लगइन हुन नसकेका हुन् । यसको मरमतको काम पनि शेयर दलालहरुको नै हो । भेण्डर कम्पनीमार्फत दलाल व्यवसायीले उक्त उपकरण मर्मत गर्नु पर्छ ।
ब्रोकरको टीएमएसमा आएको खराबीको असरले नेप्सेको नट प्रणालीमा कुनै असर नपारेको नेप्सेले प्रष्ट पारेको छ । साथै उक्त प्राथमिक फायरवाल शेयर दलालहरुले मर्मत नगरुञ्जेलसम्मका लागि वैकल्पिक फायरवालबाट प्रणाली सुचारु गराइने नेप्सेले बताएको छ ।
अहिले वैकल्पिक फयरवाल जडान भैसके पछि कारोबार अवरुद्ध भएको बाँकी समयको शेयर कारोबार गराइने पनि नेप्सेले प्रष्ट पारेको छ ।
शेयर दलालहरुले बुधबार समस्या देखिने बित्तकै फायरवालको समस्या समाधान गर्न सकेको भए बाँकी समयको कारोबार स्थगित हुने अवस्था नआउने दाबी नेप्सेको छ । यस किसिमका प्राविधिक खरबीको तत्काल समाधान गर्ने संयन्त्र तयार गर्न पनि शेयर दलालहरुलाई नेप्सेले आग्रह गरेको छ ।
