नेप्सेले लघुवित्तको पहिलो शेयर कारोबारका लागि जिजिबिएसएल (GGBSL) कारोबार संकेत प्रदान गरेको छ। बुधबारदेखि लघुवित्तको यहि संकेतमा कारोबार हुनेछ।
त्यसैगरि नेप्सेले घोडीघोडा लघुवित्तको सुरुवाती कारोबारका लागि न्यूनतम ७७ रुपैयाँ १ पैसा देखि अधिकतम २३१ रुपैयाँ ३ पैसासम्म ओपनिङ्ग रेञ्ज प्रदान गरेको छ। सोहि रेञ्जलाई आधार मानेर बुधबार लघुवित्तको पहिलो कारोबार खुल्नेछ।
नेप्सेले हरेक कम्पनीलाई पहिलो कारोबरका लागि सो कम्पनीको प्रतिशेयर नेटवर्थलाई न्यूनतम कारोबार मूल्य र प्रतिशेयर नेटवर्थको तीन गुणासम्म अधिकतम ओपनिङ्ग रेञ्ज प्रदान गर्ने गरेको छ।
कम्पनीले मंगलबार प्रतिकित्ता एक सय रुपैयाँ अंकित दरमा २ करोड ७६ लाख २५ हजार रुपैयाँ बराबरको २ लाख ७६ हजार २५० कित्ता शेयर सूचीकृत गराएको थियो।
घोडीघोडा लघुवित्तले प्रभु क्यापिटलको बिक्री प्रबन्धकत्वमा गत असार २० गतेदेखि १ करोड ३२ लाख ६० हजार बराबरको १ लाख ३२ हजार ६०० कित्ता आईपीओ निष्काशन गरेको थियो। सो आईपीओ असार २७ गते बाँडफाँड गरिएको थियो। लघुवित्तको आईपीओ भाग्यमानी १२ हजार ४ सय ५९ आवेदकले दश कित्ताका दरले पाएका थिए।
कञ्चनपुरको बेलौरीमा केन्द्रीय कार्यालय रहेको लघुवित्तले कैलाली र कञ्चनपुर जिल्लाका ६ वटा शाखाबाट कारोबार गर्दै आएको छ। घोडाघोडी लघुवित्तले जारी पूँजीको ४८ प्रतिशत सार्वजनिक निष्काशन गरेको थियो।
