पछिल्लो समय नेप्सेमा बनेको हेड एण्ड सोल्डर प्याटर्नले ट्रेडरहरुमाझ भएको प्याटर्नको भौतिक उपस्थितिले मात्र यसको शक्ति निर्धारण गर्दछ भन्ने एक साझा भ्रम पैदा गरेको छ।
यस प्याटर्नलाई सुक्ष्म अध्ययन गरौँ, एक पाठ्यपुस्तकमा भएकाे उदाहरण हेरौँ र त्यसपछि प्याटर्नको वैधता पुष्टि गर्न भोल्यूम किन एक महत्त्वपूर्ण तत्व हो भन्ने कुरा प्रष्ट पार्न त्यसलाई हाल नेप्सेमा बनेको प्याटर्नसँग तुलना गरौँ।
सामान्यतया, हेड एण्ड सोल्डर प्याटर्नमा, पहिला मूल्य बाँया सोल्डरबाट बढ्छ, त्यसपछि उच्च विन्दुमा पुगेर हेड बनाउँछ र फेरी अर्को र्यालीले तल्लो उचाई बनाउँछ, जसलाई दाँया सोल्डर भनिन्छ। हेड र सोल्डरहरुको तल्लो विन्दु जोड्ने नेकलाइनलाई ब्रेक गरेर यो प्यार्टन पूर्ण हुन्छ।
माथि दिइएको उदाहरणमा निम्न कुराहरु समावेश छन्ः
१. बाँया सोल्डरः मूल्यले सामान्य रिट्रेसमेन्टहरु पछ्याउँदै नयाँ हाई बनाउँछ।
२. हेडः थप प्रमुख रिट्रेसमेन्टहरु समावेश हुँदै एक नयाँ उच्च हाइ बनाउँछ।
३. दाँया सोल्डरः कमजोर बुलिश मोमेन्टमलाई संकेत गर्दै मूल्यले तल्लो हाइ बनाउँछ।
४. नेकलाइन ब्रेकः एकपटक नेकलाइन ब्रेक भएपश्चात मूल्य अझ घट्ने अपेक्षा गरिन्छ।
बलियो हेड एण्ड सोल्डर प्याटर्नमा भोल्यूमको महत्त्वः
- बाँया सोल्डर बन्दा भोल्यूम बढ्छ।
- हेड बन्दै गर्दा भोल्यूम घट्छ जसले खरिद इच्छा कम भएको संकेत गर्दछ।
- नेकलाइन ब्रेक हुँदा भोल्यूम बढ्नु आवश्यक छ, यसले बियरहरुले बजारलाई नियन्त्रणमा लिएको निश्चित गर्दछ र बियरिश रिभर्सलको शक्तिलाई वैधता दिन्छ।
नेप्सेमा बनेको हेड एण्ड सोल्डर प्यार्टन पाठ्यपुस्तकमा दिइएकाे उदाहरणभन्दा कति फरक?
पछिल्लो समय, नेप्सेमा पनि, माथि उदाहरणमा देखिएको जस्तै हेड एण्ड सोल्डर प्याटर्न बनेको छः बाँया सोल्डर, उच्च विन्दुसहितको हेड र दाँया सोल्डर अनि नेकलाइनलाई ब्रेक गर्दै नेप्से तल झर्नु। झट्ट हेर्दा यस्तो प्याटर्न बनेपनि, नजिकबाट नियाल्दा, नेकलाइन ब्रेकडाउन हुँदा भोल्यूममा निरन्तर घट्दाे क्रममा रहेकाे छ। नेप्सेमा बनेकाे भाेल्यूमकाे याे प्याटर्न पाठ्यपुस्तकमा भएकाे उदाहरणसँग मिल्दैन। यसले नेप्सेमा बनेकाे प्याटर्न कमजाेर छ भन्ने पुष्टि गर्छ।
नेप्सेमा देखिएको अवस्थाः
- नेप्सेले नेकलाइन ब्रेक गर्यो, जसले, झट्ट हेर्दा प्याटर्न उस्ताउस्तै देखियाे।
- ब्रेकडाउनको बेला भोल्यूम घट्यो, जुन प्याटर्नको शक्ति एकदम कमजाेर रहेकाे तथ्यलाई उजागर गर्ने पक्ष हो।
माथि दिइएको उदाहरणभन्दा, नेप्सेमा बनेको यो प्याटर्न एकदम फरक छ, जहाँ बियरिश ट्रेण्डलाई निश्चित गर्न, हामी भोल्यूम बढ्नु आवश्यक छ। घटेको भोल्यूमले कमजोर सेलिङ्ग प्रेसरलाई संकेत गर्दछ भने फेक ब्रेकडाउन अथवा कमजोर डाउनवार्ड मुभको सम्भावनालाई दर्शाउँछ।
भोल्यूम किन महत्त्वपूर्ण छ?
प्राविधिक विश्लेषणमा भोल्यूमलाई प्रायः ‘फ्युल’ को संज्ञा दिइन्छ। बलियाे भोल्यूम बिनाको ब्रेकडाउन प्रायः कमजोर हुन्छ र यसले सोचेजस्तो डाउनवार्ड मोमेन्टम आउन सम्भावना कम हुन्छ। हेड एण्ड सोल्डर प्याटर्नमाः
ब्रेकडाउनमा बढ्दो भोल्यूमले बिक्रीकर्ताहरुको बलियो उपस्थितिलाई संकेत गर्दछ र बियरले बजारलाई नियन्त्रणमा लिएको निश्चित गर्दछ।
ब्रेकडाउनमा घट्दो भोल्यूमले हिचकिचाहत संकेत गर्दछ जसको अर्थ, बजार विश्वस्त भएर अझ तल झर्न तयार छैन भन्ने हुन्छ। यसले मूल्य फर्किन सक्ने (अर्थात पुनः बढ्न सक्ने), अझ बलियो हुने अथवा ब्रेकडाउन सफल नहुने सम्भावनालाई बढाउँछ।
हाल नेप्सेमा झट्ट हेर्दा उस्तै देखिने प्याटर्न बनेको छ, तर ब्रेकडाउनको समयमा भोल्यूम नबढ्नुले प्याटर्नको विश्वसनियता घटाउँछ। यस अवस्थाले चार्ट प्याटर्नहरुसँगै भोल्यूम विश्लेषण पनि गर्नु महत्त्वपूर्ण छ भन्ने एक सही उदाहरण प्रस्तुत गर्दछ।
प्राविधिक सुझावः
नेप्सेको वर्तमान अवस्थामा, ट्रेडरहरुले हालै बनेको हेड एण्ड सोल्डर प्याटर्नलाई सावधानीपूर्वक हेर्नुपर्छ। यहाँ केही सुझाव दिइएको छः
१. भोल्यूमको कन्फर्मेशन कुर्नेः कुनै पनि सर्ट पोजिशन लिनुभन्दा अघि, सेलिङ्ग प्रेसरलाई निश्चित गर्न बढ्दो भोल्यूमलाई कुर्नु आवश्यक छ। बढ्दो भोल्यूम बिना, बजारको गिरावटलाई निरन्तरता दिने शक्तिको कमी प्याटर्नमा हुनसक्छ।
२. प्राइस एक्सनलाई नजिकबाट नियाल्नेः यदि बलियो भोल्यूम बिना नै मूल्य नेकलाइनभन्दा माथि रिबाउण्ड हुन्छ भने, यसले गलत ब्रेकआउटको संकेत गर्दछ। यसले प्याटर्नलाई अवैध पुष्टि गर्दै, कन्सोलिडेशन अथवा पुनः वृद्धि हुनसक्छ।
३. स्टप लसको प्रयोगः यदि तपाईले यो प्याटर्नको आधार सर्टिङ्ग गरिसक्नु भएको छ भने, अकस्मात रिभर्सलबाट बच्नका लागि नेकलाइनभन्दा माथि टाइट स्टप लस गर्ने रणनीति बनाउनुहोस्।
४. थप कन्फर्मेशनको प्रतिक्षाः यस प्याटर्नसँगै आरएसआई, मुभिङ्ग एभरेज अथवा एमएसिडी जस्ता अन्य प्राविधिक उपकरणहरुको प्रयोगले, याे प्याटर्न वैध हो कि अवैध हो भन्ने पुष्टि गर्न मद्दत गर्दछ। उदाहरणको लागि, पछिल्लो दाँयो सोल्डरमा आरएसआईले ओभरबटको कुनै संकेत दिएको छैन, जसले प्याटर्नको वैधता थप कमजोर बनाउँछ।
निष्कर्षः
हालै नेप्सेमा बनेको प्याटर्नले, उस्ताउस्तै प्याटर्न बनेपनि त्यो किन शक्तिशाली हुँदैन भन्ने उदाहरण प्रस्तुत गर्दछ। चार्ट प्याटर्नहरुको वैधता सुनिश्चित गर्न, विशेष गरी हेड एण्ड सोल्डर प्याटर्नमा, भोल्यूमले महत्त्वपूर्ण भूमिका निर्वाह गर्दछ। नेकलाइन ब्रेकडाउन भएको बेलामा भोल्यूम बढेन भने, यस प्याटर्नलाई सुक्ष्म अध्ययन गर्नुपर्छ।
यस्ता साना साना कुराहरु बुझेर, ट्रेडरहरुले फेक सिग्नलहरुबाट बच्न र राम्रो निर्णय लिन सक्छन्। याद राख्नुहोस्ः प्राइस प्याटर्नहरु पजलको एक टुक्रा मात्र हो, अन्य प्राविधिक उपकरणहरु र भोल्यूमकाे विश्लेषणले मात्र पूर्ण चित्र दर्शाउँछ।
बजारमा केही व्यक्तिहरूले आफ्नाे स्वार्थ पुर्तिका लागि याे प्याटर्नकाे प्रयाेग गरी नकारात्मक हल्ला फैलाइरहेका छन्। कुकुरलाइ बाघकाे छाला ओढाएर बाघ आयाे बाघ आयाे भनेर त्रास फैलाएजसरी नै याे प्याटर्नकाे प्रयाेग गरी सर्वसाधारणमाझ त्रास फैलाइरहेका छन्। यस्ता भ्रामक कुराहरूकाे पछि नलागी जस्ताेसुकै प्याटर्न बनेपनि त्यसकाे वैधतालाई पुष्टि गर्न अन्य उपकरणहरूकाे प्रयाेग गर्नु आवश्यक छ।
(यो सामग्री केबल शैक्षिक उद्देश्यका लागि प्रस्तुत गरिएको हो। कुनै पनि लगानी निर्णय गर्नु अघि, कृपया आफ्नो वित्तीय परामर्शदाता वा विशेषज्ञसँग सल्लाह गर्नु उपयुक्त हुनेछ। यसमा दिइएका प्राविधिक विश्लेषण र सिफारिसहरूले बजारमा निश्चित लाभको ग्यारेन्टी गर्दैन। लगानी जोखिमयुक्त हुन्छ र उचित अनुसन्धान आवश्यक छ।)
