साताको दोस्रो कारोबार दिन नेप्से परिसूचक घटेर बन्द भएको छ। अघिल्ला तीन कारोबार दिनदेखि बढीरहेको नेप्से, यस दिन करेक्सन भएर बन्द भएको हो। अल्पकालिन लगानीकर्ताहरुले नाफा बुक गरेसँगै यस दिन नेप्सेमा करेक्सन भएको हो।

मंगलबार नेप्से परिसूचक १६.९५ अंक घटेर २६७६.१७ विन्दुमा झरेको छ। त्यस्तै, यस दिन सेन्सेटिभ इण्डेक्स ३.५७ अंक घटेको छ भने फ्लोट इण्डेक्स १.४७ अंक र सेन्सेटिभ फ्लोट इण्डेक्स १.०६ अंक घटेको छ।

नेप्सेसँगै यस दिन कारोबार रकम पनि घटेको छ। अघिल्लो कारोबार दिन अर्थात आइतबार साढे ७ अर्बको शेयर खरिदबिक्री भएको बजारमा यस दिन ३२० स्टकको ५६ हजार ५४८ पटकको कारोबारमा ५ अर्ब ७९ करोड ७७ लाख ९१ हजार रुपैयाँबराबरको १ करोड ६ लाख ७० हजार कित्ता शेयर खरिदबिक्री भएको छ।

यस दिन गार्डियन माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको छ। सो कम्पनीको शेयरमूल्य यस दिन २३४ रुपैयाँ ५० पैसा बढेर २ हजार ५७९ रुपैयाँ ८० पैसामा अन्तिम कारोबार भएको छ। कम्पनीले शतप्रतिशत हकप्रद शेयर निष्काशन गर्ने घोषणा गरेसँगै शेयरमूल्य बढ्न पुगेको हो। यस दिन राधी विद्युत कम्पनी, सयपत्री हाइड्रोपावर र विशाल बजार कम्पनीको शेयरमूल्य ४ प्रतिशतभन्दा बढी बढेको छ। कारोबारमा आएको गुराँस लघुवित्त वित्तीय संस्थाको शेयरमूल्य सर्वाधिक ५.५६ प्रतिशत घटेको छ।

कारोबार रकमका आधारमा यस दिन हिमालयन रि इन्स्योरेन्स शीर्ष स्थानमा रहेको छ। सो कम्पनीको यस दिन ६४ करोड २५ लाख रुपैयाँबराबरको शेयर कारोबार भएको छ। त्यस्तै, यस दिन एनआरएन इन्फ्रास्ट्रक्चर एण्ड डेभलपमेन्टको साढे ४५ करोडभन्दा बढीको शेयर खरिदबिक्री भएको छ भने सिईडिबी होल्डिङ्खसको करिब २८ करोडको शेयर किनबेच भएको छ।

१३ उपसमूहमध्ये यस दिन १२ उपसमूहको परिसूचक घटेको छ भने एक उपसमूहको परिसूचक बढेको छ। यस दिन व्यापार उपसमूहको परिसूचक ३.८० प्रतिशत बढेको छ। कारोबारमा आएको वित्त उपसमूहको परिसूचक यस दिन सर्वाधिक १.८४ प्रतिशत घटेको छ। त्यस्तै, यस दिन होटल तथा पर्यटन उपसमूहको परिसूचक साढे १ प्रतिशतभन्दा बढी घटेको छ भने लघुवित्त र अन्य उपसमूहकाे परिसूचक १ प्रतिशतभन्दा बढी घटेकाे छ।