राष्ट्र बैंकको व्यवस्था अनुसार आर्थिक बर्ष २०७४/७५ मा बैंकले तीन अर्ब ७ करोड ७२ लाख नाफा कमाएकोमा ५९ करोड ६० लाख ६९ हजार रेगुलेटरी एड्जस्टमेन्ट वापत रकम थपिँदा बैंकको लाभांश क्षमता तीन अर्ब ६७ करोड ३२ लाख रुपैयाँ पुगेको हो ।
यो रकम बैंकले केन्द्रिय बैंकले तोकेको प्रावधान अनुसार तोकिएका शिर्षकहरुमा व्यवस्था पश्चात सेयरधनीलाई लाभांश वितरणमा उपयोग गर्न सक्छ ।
बैंकले एक अर्ब ८८ करोड खराब कर्जा असुली गरेकाले बैंकको नाफासँगै लाभांश क्षमतामा उल्लेख्य सुधार आएको छ । बैंकको चुक्ता पूँजी १३ अर्ब रहेको छ । जसमध्ये आठ अर्ब ५० करोड ५२ लाख रुपैयाँ साधारण सेयर र पाँच अर्ब ४३ करोड २७ लाख रुपैयाँ सरकारको अग्राधिकार सेयर छ ।
बैंकको खुद नाफाबाट सरकारले ६ प्रतिशत नगद लाभांश लैजाने गरेको छ । सरकारले अग्राधिकार सेयर वापत लाभांश लगेपछि बाँकी रकमबाट मात्र अन्य साधारण सेयरधनीलाई लाभांश वितरण हुन्छ ।
एनएफआरएस अनुसार बैंकको जगेडा कोषमा १६ अर्ब ७३ करोड ४४ लाख सञ्चित रहेको देखाएको छ । बैंकले एक बर्षमा दुई अर्ब ४५ करोड ८ लाख रुपैयाँले जगेडा बढाएको हो ।
समीक्षा अवधिमा बैंकले एक खर्ब पाँच अर्ब ६४ लाख रुपैयाँ निक्षेप संकलन गरेर ९९ अर्ब ८६ करोड ६० लाख कर्जा लगानी गरेको छ । बैंकले १३ अर्ब ७६ करोड ८१ लाख ब्याज आम्दानी गरेर ६ अर्ब ९६ करोड ६१ लाख ब्याज खर्च गरेको छ । जसबाट उसले ६ अर्ब ८० करोड २० लाख खुद ब्याज आम्दानी गरेको छ ।
बैंकको खराब कर्जा ४.६० बाट घटाएर ३.१९ प्रतिशतमा खुम्चिाएको छ । प्रतिशेयर आम्दानी ३९ रुपैयाँ ३६ पैसा तथा प्रतिसेयर नेटवर्थ २३१ रुपैयाँ ८६ पैसा र मूल्य आम्दानी अनुपात ७.९८ गुणा कायम भएको छ । त्यस्तै बैंकको आधार ब्याजदर ११.७३ प्रतिशत र कोषको लागत ७.३८ प्रतिशत पुगेको छ ।
