भेटमा सहभागी फोरमका उपाध्यक्ष छोटेलाल रौनियारले शेयर बजारमा कर बिषयमा रहेको अन्योल पाँच दिनभित्र अन्त्य गरिने जानकारी राजश्व सचिव ढुंगानाले बताएको मेरो लगानीलाई जानकारी दिए ।
उनका अनुसार बोनस र हकप्रदमा शेयरमा लाग्ने पूँजीगत लाभकर पनि लगानीकर्तालाई मार नपर्नेगरी लागू गरिने अर्थमन्त्रालयको योजना छ । शेयर कारोवारमा व्यक्तिगत रुपमा लाग्ने ७.५ प्रतिशत पूँजीगत लाभकर नै अन्तिम कर भएको परिपत्र केहिदिन भित्र जारी हुने समेत ढुंगानाले बताए ।
नयाँ आर्थिक बर्ष सुरु भएको डेढ महिना बित्दा समेत पूँजीबजारले राम्रो लय नलिएपछि फोरमले अर्थ सचिवलाई ज्ञापनपत्र दिएको हो । पूँजीबजारमा लाग्ने लाभकरका बिषयमा लगानीकर्तामा अन्यौल कायमै रहेपछि सोको स्थायी निराकरणको माग गर्दै फोरमका प्रतिनिधिहरु अर्थमन्त्रालय पुगेका हुन । उनीहरुका अनुसार कर अन्यौल पनि बजार नबढने कारण हो ।
इन्भेष्टर्स फोरमले बुधबार बुझाएकां धेरै मागहरु पहिलादेखि नै उठाएका मागहरु छन । पूर्ण अनलाइन कारोबार प्रणलीलाई छिटो भन्दा छिटो कार्यान्वयन गर्नुपर्ने, कर विवादलाई निराकरण गर्नुपर्ने, लाभकर निर्धारण समितिमा लगानीकर्ताहरुको प्रतिनिधित्व गराउनु पर्ने र सुचीकृत कम्पनीहरुको मूल्य सहितको खरिद बिक्री देखिने सफ्टवेयरको विकास गर्नुपर्ने लगायतका माग फोरमले राखेको छ ।
यस्तै गैरआवसिय नेपालीहरुलाई पूँजी बजारमा प्रवेश गराउन आवश्यक कानुनको निमार्ण गर्नुपर्ने, धितोपत्र बोर्ड, नेप्से, सिडिएससिको क्षमता अभिवृद्धि गरी प्रविधिमैत्री बनाउनु पर्ने, लगानीकर्ताहरुलाई सचेतनामुलक कार्यक्रम संचालन गर्ने माग समेत फोरमले गरेको छ ।
शेयर कर्जामा लगाएको पूँजीगत जोखिमको भार १०० प्रतिशतमा झार्न र शेयर धितो कर्जाको सिमा बजार मूल्यको ८० प्रतिशत पुर्याउन पनि फोरमले माग गरेको छ ।
