साधारण सभा प्रयोजनका लागि जेठ ९ गतेदेखि शेयरधनी दर्ता पुस्तिका बन्द गर्ने बैंकले जनाएको छ । बैंकले नेप्से मार्फत सार्वजनिक गरेको सूचनामा लाभांशको बिषयमा उल्लेख नहुँदा लगानीकर्तामा केहि दुविधा भने उत्पन्न भएको छ ।
ओम डेभलपमेन्ट बैंकलाई एक्विजिशन गर्ने बैंकको सम्झौता कार्यन्वयन नहुने पक्का भएपछि बैंकलाई लाभांश वितरण गर्न राष्ट्र बैंकले रोकेको हो कि भन्ने दुविधा लगानीकर्तामा पाइएको छ ।
यता बैंकले प्रस्तावित लाभांश सहित साधारण सभा आह्वान गरिएको र साधारण सभा सम्बन्धी विस्तृत सूचना विहिबारका दैनिक पत्रिकामा प्रकाशित हुने बैंकले प्रष्ट पारेको छ ।
बैंकका कम्पनी सचिव सन्तोष बरालले मेरो लगानीसँग कुरा गर्दे प्राइमको प्रस्तावित लाभांश यथावत रहेको जानकारी दिए । साथै उनले राष्ट्र बैंकले तीन महिना भित्र अन्य कुनै उपयुक्त बैंकसँग मर्जर तथा एक्विजिशनमा जान निर्देशन दिएको समेत बताए । त्यसका लागि आवश्यक गृहकार्य भईरहेको बरालको भनाई छ । ओमसँगको एक्विजिशनको सम्भावना भने अन्त्य भएको बैंकले प्रष्ट पारेको छ ।
बैंकले गत आवको वितरणयोग्य मुनाफाबाट १६ प्रतिशतका दरले बोनस शेयर वितरण गर्ने प्रस्ताव गरेको छ । अघिल्लो वर्ष बैंकले २७ प्रतिशत बोनस बाँडेको थियो ।
प्राइमको हाल चुक्ता पूँजी ८ अर्ब ३ करोड ३२ लाख ९९ हजार रुपैयाँ रहेको छ। १६ प्रतिशत बराबरको एक अर्ब २८ करोड ५३ लाख २७ हजार ८४० रुपैयाँ बोनस वितरणपछि बैंकको चुक्ता पूँजी ९ अर्ब ३१ करोड ८६ लाख २६ हजार ८४० रुपैयाँ पुग्नेछ ।
विलय सम्झौताको बुँदा नम्बर १९ मा उल्लेख भए विपरित १६ प्रतिशत बोनस वितरण गर्ने प्रस्ताव गरेपछि प्राइम कमर्सियल बैंक र ओम डेभलपमेण्ट बैंक बिचको एक्विजिशन प्रकृया टुट्न पुगेको थियो ।
चालू आर्थिक वर्षको तेस्रो त्रैमाससम्म बैंकले एक अर्ब ५४ करोड ७९ लाख ०५ हजार रुपैयाँ खुद नाफा कमाएको छ । गत आवको यसै अवधिको तुलनामा बैंकले ३१.३६ प्रतिशतले नाफा बढाएको हो। बैंकले यस अवधिमा एक अर्ब ७९ लाख ८८ हजार रुपैयाँ वितरण योग्य नाफा (फ्रि प्रोफिट) आर्जन गरेको छ।
