राष्ट्र बैंकले तीन महिना भित्र अन्य कुनै बैंक तथा वित्तीय संस्थासँग मर्जर वा एक्विजिशनमा जान निर्देशन दिएकाले पनि बैंक तुरुन्तै पार्टनर खोज्नुपर्ने अवस्थामा छ । एक्वायर प्रक्रिया तोडेको ओम डेभलपमेन्ट बैंक एनएमबिमा मिसिने भएपछि प्राइमलाई तुरुन्तै अर्को जोडी खोज्न थप दबाव परेको छ ।
बैंकले बोलाएको आगामी साधारण सभाबाट कुनै बैंक तथा वित्तीय संस्थासंग एक आपसमा मर्ज हुने (गाभ्ने/गाभिने), प्राप्ति (एक्विजिशन) गर्न सम्बन्धमा आवश्यक प्रकृया पुर्याउन संचालक समितिलाई अख्तियारी प्रदान गर्ने तयारी गरेको छ ।
बैंकले यहि जेठ २६ गते आइतबार नेपाल प्रज्ञाप्रतिष्ठान कमलादीमा बिहान १० बजे एघारौं बार्षिक साधारण सभा डाकेको छ । साधारण सभामा बैंकले गत आर्थिक वर्षको वितरणयोग्य मुनाफाबाट १६ प्रतिशत बोनस शेयर वितरण गर्ने प्रस्ताव पारित गर्नेछ ।
प्राइमको हाल चुक्ता पूँजी ८ अर्ब ३ करोड ३२ लाख ९९ हजार रुपैयाँ छ । १६ प्रतिशत बराबरको एक अर्ब २८ करोड ५३ लाख २७ हजार ८४० रुपैयाँ बोनस वितरणपछि चुक्ता पूँजी ९ अर्ब ३१ करोड ८६ लाख २६ हजार ८४० रुपैयाँ पुग्नेछ ।
साथै बैंकले अधिकृत पूँजी १० अर्बबाट २० अर्ब पुर्याउने प्रस्ताव समेत साधारण सभामा लग्दैछ । साधारण सभाले संस्थापक शेयरधनीहरुबाट ३ जना र सर्वसाधारण शेयरधनीहरुको तर्फबाट २ जना गरी ५ जना संचालक निर्वाचन समेत गर्नेछ ।
साधारण सभा प्रयोजनका लागि जेठ ९ गतेदेखि शेयरधनी दर्ता पुस्तिका बन्द गर्ने बैंकले जनाएको छ । त्यस अनुसार जेठ ८ गते सम्म कायम शेयरधनीहरुले बैंक लाभांश र साधारणसभामा भाग लिन पाउनेछन् ।
चालू आर्थिक वर्षको तेस्रो त्रैमाससम्म बैंकले एक अर्ब ५४ करोड ७९ लाख ०५ हजार रुपैयाँ खुद नाफा कमाएको छ । गत आवको यसै अवधिको तुलनामा बैंकले ३१.३६ प्रतिशतले नाफा बढाएको हो। बैंकले यस अवधिमा एक अर्ब ७९ लाख ८८ हजार रुपैयाँ वितरण योग्य नाफा (फ्रि प्रोफिट) आर्जन गरेको छ।
