नेप्सेमा यसअघि कूल ३३ विकास बैंक अस्तित्वमा रहेकोमा ९ वटा विकास बैंक अन्य बैंकसँग मर्जर तथा प्राप्तीमा गएर आफ्नो अस्तित्व समाप्त पारिसकेका छन्।
यस अवधिमा हाम्रो विकास बैंक, एनआईडिसी डेभलपमेन्ट बैंक, बेष्टर्न डेभलपमेन्ट बैंक, काबेली विकास बैंक, कन्काई विकास बैंक, भार्गव विकास बैंक, पूर्णिमा विकास बैंक, मिसन डेभलपमेन्ट बैंक, र ओम डेभलपमेन्ट बैंक अन्य बैंकसँग मर्जर तथा प्राप्तीमा गएर आफुलाई विलय गराएका हुन्।
बाँकी रहेका २४ विकास बैंकमध्ये २१ विकास बैंकको वित्तीय विवरण सार्वजनिक भएको छ भने रुपन्देही बुटबवमा केन्द्रीय कार्यालय रहेको नेपाल कम्युनिटी डेभलपमेन्ट बैंक (जुन तिनाउ मिसन डेभलपमेन्ट बैंकसँग प्राप्ती प्रकृयामा रही मंसिर २२ गतेदेखि एकीकृत कारोबार थाल्दैछ) , सुर्खेत, नेपालगञ्जमा कार्यालय रहेको कर्णाली विकास बैंक र समस्याग्रस्त संस्थाबाट गुज्रिएको चितवनको रत्ननगरमा कार्यालय रहेको नारायणी डेभलपमेन्ट बैंकले भने वित्तीय विवरण सार्वजनिक गरेका छैनन्।
नारायणी डेभलपमेन्ट बैंकले समस्याग्रस्त भएपछि लामो समयदेखि वित्तीय विवरण प्रकाशनमा ल्याएको छैन भने कर्णाली डेभलपमेन्ट बैंकले पनि गत आवको तेस्रो त्रैमासपछिको वित्तीय विवरण सार्वजनिक गरेको छैन। उता नेपाल कम्युनिटीले गत आवको चौंथो त्रैमासको वित्तीय विववरण सार्वजनिक गरेपनि प्रथम त्रैमासको वित्तीय विवरण भने सार्वजनिक नगरेको हो।
- सैंतिस अर्ब पूँजी परिचालन गरेर २१ बैंकले कमाए साढे एक अर्ब मुनाफा
वित्तीय विवरण सार्वजनिक गरेका २१ विकास बैंकले ३७ अर्ब २२ करोड ६४ लाख ८६ हजार रुपैयाँ पूँजी लगाएर विकास बैंकहरुले ५ अर्ब ३२ करोड ४८ लाख ५७ हजार सञ्चालन नाफा र एक अर्ब ४९ करोड ६२ लाख ६२ हजार रुपैयाँ खुद नाफा आर्जन गरेका छन्। यो खुद नाफा चुक्ता पूँजीको ४.०२ प्रतिशत हुन आउँछ।
यस अवधिमा विकास बैंकहरुको औसत चुक्ता पूँजी एक अर्ब ७७ करोड २६ लाख ९० हजार र औसत खुद नाफा ७ करोड १२ लाख ५० हजार रुपैयाँ रहेको छ । यस्तै २ रुपैयाँ ९२ पैसादेखि २८ रुपैयाँ १६ पैसासम्म वार्षिक औसत प्रतिशेयर आम्दानी कायम गरेका छन्। विकास बैंकहरुको औसत इपिएस १४ रुपैयाँ ७९ पैसा रहेको छ।
यस अवधिमा यी बैंकहरुले ३ खर्ब ५९ अर्ब ६१ करोड २१ लाख २५ हजार निक्षेप संकलन गरि ३ खर्ब १९ करोड ७४ लाख ९० हजार ९४ हजार रुपैयाँ कर्जा परिचालन गरेका छन्।