चालु आर्थिक वर्षको दोस्रो त्रैमाससम्ममा २७ वाणिज्य बैंकहरुको चुक्ता पूँजी ३ खर्बभन्दा माथि पुगेको छ। यस अवधिमा २७ वाणिज्य बैंकको कुल चुक्ता पुँजी ३ खर्ब १० अर्ब रुपैयाँ पुगेको हो।
वाणिज्य बैंकहमा जनतालाई गाभेको ग्लोबल आइएमई बैंकको चुक्ता पूँजी सबैभन्दा धेरै २१ अर्ब ६३ करोड रुपैयाँ रहेको छ भने सिभिल बैंकको सबैभन्दा कम ८ अर्ब ३३ लाख रुपैयाँ रहेको छ।
त्यस्तै जगेडा कोषमा नेपाल बैंक सबैभन्दा अग्र स्थानमा रहेको छ। बैंकको जगेडा कोषमा १९ अर्ब ३५ करोड रुपैयाँ सञ्चित छ। यो वाणिज्य बैंकहरु मध्येकै धेरै हो। त्यस्तै नविल बैंकको पनि जगेडा कोषमा १५ अर्ब रुपैयाँभन्दा धेरै छ।
सेञ्चुरी कमर्शियल बैंकको जगेडा कोषमा सबैभन्दा कम १ अर्ब ७० करोड रुपैयाँ मात्रै छ।
- कर्जा लगानी झण्डै ३२ खर्ब, निक्षेप र कर्जा दुबैमा एनआईसि एशिया अगाडि
चालु आर्थिक वर्षको दोस्रो त्रैमाससम्ममा २६ वाणिज्य बैंकहरुले कुल ३१ खर्ब ८० अर्ब निक्षेप संकलन गरी २९ खर्ब ३७ अर्ब रुपैयाँ कर्जा लगानी गरेका छन्।
निक्षेप र कर्जा दुबैमा एनआईसी एशिया बैंकले पहिलो स्थान ओगट्न सफल भएको छ। पुस मसान्तसम्ममा बैंकले २ खर्ब ६८ अर्ब निक्षेप संकलन गरी २ खर्ब २१ अर्ब रुपैयाँ कर्जा लगानी गरेको छ।
यसैगरी निक्षेप संकलन र कर्जा लगानीको हिसाबले सिभिल बैंक सबैभन्दा पछाडि देखिएको छ। पुस मसान्तसम्मा उसले ७६ अर्ब निक्षेप संकलन गरी ६५ अर्ब कर्जा लगानी गरेको छ।
- प्रतिशेयर आम्दानी र प्रतिशेयर नेटवर्थ
दोस्रो त्रैमासको वित्तीय विवरण अनुसार राष्ट्रिय वाणिज्य बैंकको प्रतिशेयर आम्दानी सबैभन्दा धेरै ३८ रुपैयाँ ८४ पैसा रहेको छ भने सिभिल बैंकको सबैभन्दा कम ५ रुपैयाँ ६ पैसा रहेको छ।
त्यसैगरी, प्रतिशेयर नेटवर्थको आधारमा पनि राष्ट्रिय वाणिज्य बैंक नै सबैभन्दा अगाडि रहेको देखिएको छ। सेञ्चुरी बैंकको प्रतिशेयर आम्दानी भने सबैभन्दा कम ११८ रुपैयाँ ८७ पैसा रहेको छ।
वितरणयोग्य प्रतिशेयर आम्दानी पनि राष्ट्रिय वाणिज्य बैंकको सबैभन्दा धेरै ४० रुपैयाँ रहेको छ। त्यस्तै, सिद्धार्थ बैंकको वितरणयोग्य मुनाफा भने २ रुपैयाँले ऋणात्मक छ।
चालु आर्थिक वर्षको दोस्रो त्रैमाससम्ममा एनआइसि एशिया बैंकको रिटर्न अन इक्वीटि सबैभन्दा धेरै २१ रुपैयाँ ४३ पैसा रहेको छ। त्यस्तै सिभिल बैंकको रिटर्न अन इक्वीटि सबैभन्दा कम ३.९१ प्रतिशत छ।
वाणिज्य बैंकहरुको रिटर्न अन इक्वीटि औसतमा ११.७७ प्रतिशत रहेको छ।
दोस्रो त्रैमाससम्ममा वणिज्य बैंकहरुको खराब कर्जा औषतमा १.६८ प्रतिशत रहेको छ जसमा सरकारी स्वामित्वको खराब कर्जा सबैभन्दा धेरै ४.२३ प्रतिशत र एभरेष्ट र नेपाल एसविआई बैंकको खराब कर्जा ०.१९ प्रतिशत छ।
दोस्रो बजारमाा सूचीकृत २६ वटा वाणिज्य बैंकहरुमध्ये नविल बैंकको शेयरमूल्य सबैभन्दा धेरै १११० रुपैयाँ रहेको छ भने सिभिल बैंकको शेयरमूल्य सबैभन्दा कम २२० रुपैयाँ रहेको छ।
त्यसैगरी, हिमालयन बैंकको मूल्य आम्दानी अनुपात सबैभन्दा धेरै ४३.७८ गुणा रहेको छ भने नेपाल बंगलादेश बैंकको सबैभन्दा कम १३.७३ गुणा रहेको छ।
वाणिज्य बैंकहरुको मूल्य आम्दानी अनुपात औषतमा २३.२७ गुणा पुगेको छ।