यस घटनापछि नेपाल पर्यटन बोर्ड, पर्यटक प्रहरी र सरोकारवाला निकायहरूले प्रभावित क्षेत्रमा रहेका पर्यटकहरूको खोजी तथा सुरक्षास्थितिको प्रमाणीकरण कार्य तीव्र पारिरहेका छन्।
पर्यटन तथा ट्राभल कम्पनीहरूबाट प्राप्त एजेन्सीगत विवरणअनुसार बेपत्ता हुनेहरूमा २९१ जना विदेशी नागरिक र ९३ जना नेपाली नागरिक रहेका छन्। स्थानीय प्रशासन, सुरक्षा निकाय र ट्राभल एजेन्सीहरूसँगको समन्वयमा उक्त विवरणलाई प्रमाणीकरण तथा क्रस-चेक गर्ने काम भइरहेको बोर्डले जनाएको छ।
प्राप्त विवरण अनुसार सम्राट टुर एण्ड ट्राभल्समार्फत गएका ७१ जना (५९ भारतीय र १२ नेपाली), काठमाडौं हलिडे टुर एण्ड ट्राभल्सका १७ जना (२ विदेशी र १५ नेपाली), तथा लीफ हलिडेका ५५ जना (४६ भारतीय र ९ नेपाली) सम्पर्कविहीन छन्। त्यसैगरी, कैलाश जर्नीका ३१ जना (२६ राष्ट्रियता खुल्न बाँकी र ५ नेपाली), एक्सप्लोर भेकेसनका ७ जना नेपाली, ट्रेकर्स सोसाइटीका ९२ जना (७७ राष्ट्रियता खुल्न बाँकी र १५ नेपाली), र रिचा टुर एण्ड ट्राभल्सका १२ जना (८ राष्ट्रियता खुल्न बाँकी र ४ नेपाली) रहेका छन्। यसैगरी, फिसटेल टुर एण्ड ट्राभल्सका २७ जना (२० विदेशी र ७ नेपाली), हिमालयन ग्लेसियरका ५२ जना (३७ एनआरआइसी र १५ नेपाली) तथा अल्पाइन इको ट्रेकका २० जना (१६ विदेशी र ४ नेपाली) पनि बेपत्ता सूचीमा छन्।
