प्रोगेसिभ फाइनान्सले गत आव २०७४/७५ मा जम्मा ३५ लाख ४७ हजार मात्रै खुद नाफा गरेको वित्तीय विवरण सार्वजनिक गरेको छ । जुन अघिल्लो आर्थिक बर्षको तुलानामा एक करोड पाँच लाख कम हो । अघिल्लो वर्ष फाइनान्सले १ करोड ४० लाख खुद नाफा गरेको थियो ।
कम्पनीको सञ्चालन खर्च, कर्मचारी खर्च, प्रोभिजन रकम खर्च लगायतको उच्च वृद्धिले सञ्चालन घाटामा पुगेको छ । कम्पनी ४५ लाख ३८ हजार सञ्चालन नोक्सानीमा रहेको छ ।
सञ्चालन घाटामा रहेको कम्पनीले तरल राजनीतिक अवस्था र तीन बर्ष अगाडिको भूकम्पलाई नाफा घट्नुको कारण बताएको छ । २८१ प्रतिशत हकप्रद बेच्ने अन्तिम तयारीमा रहेको कम्पनीले आगामी दिनमा व्यवसाय विस्तारमा जोड दिने वित्तीय विवरणमा उल्लेख गरेको छ ।
कम्पनीले गत असारमसान्तसम्म ७८ करोड ४६ लाख निक्षेप संकलन गरेर ५१ करोड २ लाख रुपैयाँ कर्जा परिचालन गरेको छ । कम्पनीको खराब कर्जा अनुपात १.५४ प्रतिशत, प्रतिशेयर आम्दानी १.६९ रुपैयाँ तथा प्रति शेयर नेटवर्थ १०५ रुपैयाँ छ ।
फाइनान्सले हकप्रद प्रयोजनका लागि साउन २३ गते बुक क्लोज गर्देछ । यसअनुसार साउन २२ गतेसम्म कायम रहने फाइनान्सका सेयरधनीले हकप्रदमा आवेदन गर्न पाउनेछन् ।
कम्पनीको हाल चुक्ता पूँजी २१ करोड रुपैयाँ रहेको छ हकप्रद निष्काशन पश्चात फाइनान्सको चुक्ता पूँजी ८० करोड १० लाख रुपैयाँ पुग्नेछ । फाइनान्सको जगेडा कोषमा १ करोड १९ लाख छ ।
