अर्थमन्त्री भन्छन् : 'हाम्रो वित्तीय साक्षरता कमजोर छ, बुझेर मात्रै लगानी र कारोबार गरौं '

Jul 02, 2019 11:59 AM merolagani

अर्थमन्त्री डा. युवराज खतिवडाले नेपालमा अझै पनि वित्तीय साक्षरताको अवस्था कमजोर रहेको बताएका छन् । नेपाल धितोपत्र बोर्डले आयोजना गरेको अन्तराष्ट्रिय वित्तीय साक्षरता सम्मेलनको उद्घान गर्दै मन्त्री खतिवडाले वित्तीय साक्षरताको अभाव गरिने शेयरको लगानी जोखिममा हुने बताए ।

मन्त्री खतिवडाले नेपालको शेयर बजारमा अधिकांस बैंक तथा वित्तीय संस्थाहरु सूचिकृत रहेको उल्लेख गर्दे यस क्षेत्रमा लगानी गर्नेहरुमा पनि वित्तीय साक्षरता कमजोर रहेको बताए । वित्तीय क्षेत्रमा लगानी गर्नेलाई आफूले लगानी गर्ने संस्थाबारे धेरै जानकारी हुनुपर्ने अर्थमन्त्रीको भनाई छ ।

अर्थमन्त्रीले भने, 'वित्तीय साक्षरता विकास गर्न कम्पनीबारे बुझेर मात्रै लगानी गर्नुपर्छ, धेरै बिषय कम्पनीले प्रकाशित गर्ने वासलातमा आउँछ, कम्पनीको वासलात पढ्ने र साधारणसभामा प्रस्तुत भएका वार्षिक प्रतिवेदनहरुको अध्ययन गर्ने बानीको विकास गर्नुपर्छ ,' कम्पनी बारे नबुझी गरेको लगानीमा जोखिम बढी हुने उनको भनाई थियो ।

बैंक तथा वित्तीय संस्थाको कारोबार गर्ने धेरै मानिसमा वित्तीय साक्षरता पुर्याउनुपर्नेमा अर्थमन्त्रीले जोड दिए । नेपालका बैकिङ कारोबार गर्नेहरु बढेपनि उनीहरुमा प्रयाप्त वित्तीय साक्षरता पुग्न नसकेको उनको भनाई थियो ।

नयाँ प्रविधिको प्रयोगले वित्तीय क्षेत्रमा चुनौती बढाइरहेको अर्थमन्त्रीको भनाई छ । उनले आफुलाई अहिलेसम्म पनि प्रविधि मार्फत गर्ने कारोबारमा आत्माविश्वास नभएको बताए । ’म जस्तो व्यक्तिलाई त प्रविधि मार्फत गरिने कारोबारप्रति आत्माबिश्वास छैन भने अरुको के अवस्था होला’ अर्थमन्त्रीले भने ’नेपालमा प्रयाप्त रुपमा वित्तीय साक्षरता नभएका कारणले त्यसमा काम गर्नु पर्ने अवस्था छ ।’

अर्थमन्त्री खतिवडाले वित्तीय क्षेत्रमा सम्पत्ती शुद्धीकरणलगायतका मुद्दा महत्वपूर्ण बन्दै गएको उल्लेख गर्दे यस बिषयमा अझै थुप्रै काम गर्न बाँकी रहेको बताए ।

पूँजीबजारलाई लिएर नेपालमै पहिलो पटक अन्तराष्ट्रिय वित्तीय साक्षरता सम्मेलन भएको हो । सम्मेलनमा अन्तरराष्ट्रिय संस्थाहरू, पूर्व एशियाली तथा सार्क राष्ट्रका वित्तीय क्षेत्रका नियमनकारी निकायहरूका प्रतिनिधि गरी ४० जना वित्तीय क्षेत्र तथा वित्तीय साक्षरताका अन्तरराष्ट्रिय विज्ञहरूको सहभागिता छ।

 

comments powered by Disqus