शेयर बजार ओरालो लाग्दा त्यसको असर म्युचुअल फण्डहरुको वासलातमा समेत देखिएको हो ।
शेयर बजारका जानकारहरुले नयाँ प्रवेशीहरुलाई म्युचुल फण्डहरुले गरेको लगानी शैलीलाई पछ्याउन सुझाब दिने गर्छन् ।
तर पछिल्लो समय बजारको अवस्था आंकलन गरेर लगानी गर्न नसक्दा म्युचुअल फण्डहरुको समेत नोक्सानी बढ्दै गएको छ भने प्रति इकाई खुद मूल्यमा ह्रास आउने गरेको छ । लक्ष्मी बैंकको सहायक कम्पनी लक्ष्मी क्यापिटलले सञ्चालन गरेका दुई वटै म्युचुअल फण्डले जेठ महिनाको तुलनामा असारमा नोक्सानी बढेको छ हेरौं :-
लक्ष्मी भ्यालु फण्ड– १
लक्ष्मी क्यापिटलको पहिलो सामूहिक लगानी कोष लक्ष्मी भ्यालु फण्ड– १ (LVF1) काे असार मसान्तसम्ममा चार करोड ७६ लाख ६ हजार रुपैयाँ नोक्सानीमा पुगेको छ । जुन जेठको तुलनामा ११ लाख १९ हजार बढी नोक्सानीमा गएको हो । गत जेठसम्म फण्ड कूल चार करोड ६४ लाख ८६ हजार नोक्सानीमा रहेको थियो ।
लक्ष्मी भ्यालु फण्ड– १ को असार मसान्तसम्म खुद सम्पत्ति २० लाख ४१ हजार ५६० रुपैयाँले घटेर ५४ करोड १८ लाख एक हजार १७२ रुपैयाँमा सीमित भएको छ । जेठ मसान्तसम्म फण्डको खुद सम्पत्ति ५४ करोड ३८ लाख ४२ हजार ७३२ रुपैयाँ रहेको थियो ।
खुद सम्पत्ति घटेसँगै गत जेठको तुलनामा लक्ष्मी भ्यालु फण्ड १ ले असार महिनामा प्रति इकाई खुद मूल्य दुई पैसाले घटेको विवरण प्रकाशित गरेको छ । गत जेठमा १० रुपैयाँ ८६ पैसा रहेको प्रति इकाई खुद मूल्य असारमा १० रुपैयाँ ८४ पैसामा झरेको हो ।
५० करोड रुपैयाँ आकारको यस फण्डले असारसम्म ३८ वटा सूचीकृत कम्पनीहरुको शेयरमा ३१ करोड २३ लाख ०५ हजार लगानी गरेको छ । यो फण्डले नबिल बैंकको संस्थापक शेयरमा सवैभन्दा बढी ४० हजार ३१९ कित्ता शेयरमा २ करोड ७६ लाख रुपैयाँ लगानी गरेको छ ।
त्यस्तै सूचीकृत धितोपत्र र सार्वजनिक निष्काशन, हकप्रद र बोनसमा कूल पाँच लाख ५२ हजार ९१० रुपैयाँ लगानी देखिन्छ ।
फण्डले १४ करोड ४७ लाख १६ हजार रुपैयाँ बैंक मौज्दात र ९ करोड रुपैयाँ मुद्धती निक्षेपमा राखेको छ ।
लक्ष्मी इक्विटी फण्ड
यस्तै लक्ष्मी क्यापिटल कै ब्यवस्थापनमा सञ्चालित अर्को सामूहिक लगानी कोष लक्ष्मी इक्विटी फण्ड (LEMF) ले पनि नोक्सानी बढेको वित्तीय विवरण सार्वजनिक गरेको छ । फण्ड असारसम्म १६ करोड ५३ लाख ३० हजार नोक्सानी व्यहोरेको छ । गत जेठ मसान्तसम्म फण्ड १५ करोड ०६ लाख ७५ हजार रुपैयाँ नोक्सानीमा रहेको थियो ।
लक्ष्मी इक्विटी फण्डको असार मसान्तसम्म खुद सम्पत्ति एक करोड ४६ लाख ५४ हजार ७६६ रुपैयाँ घटेर एक अर्ब आठ करोड २२ लाख ४१ हजार ३१३ रुपैयाँमा झरेको छ । जेठ मसान्तसम्म फण्डको खुद सम्पत्ति एक अर्ब ९ करोड ६८ लाख ९६ हजार ७९ रुपैयाँ रहेको थियो ।
फण्डको नोक्सानी बढेपछि प्रति इकाई खुद मूल्य (नाभ) पनि घटेको छ । गत जेठमा ८ रुपैयाँ ७८ पैसा रहेको फण्डको नाभ असार मसान्तमा ८ रुपैयाँ ६६ पैसामा झरेको छ । फण्डको नाभ १२ पैसाले घटेको हो ।
एक अर्ब २५ करोड रुपैयाँ आकारको लक्ष्मी इक्विटी फण्डले ५८ सूचीकृत कम्पनीको शेयरमा ७० करोड ४४ लाख ६६ हजार रुपैयाँ लगानी गरेको छ । जस मध्ये सबैभन्दा बढी एनएमबि बैंकको एक लाख १९ हजार ८७८ कित्ता शेयरमा ४ करोड २९ लाख १६ हजार रुपैयाँ लगानी गरेको छ ।
त्यस्तै सार्वजनिक निष्काशन, हकप्रद र बोनसमा गरि १३ लाख ८१ हजार ७६५ रुपैयाँ लगानी गरेको छ । फण्डले आफुँसग रहेको रकममध्ये २२ करोड रुपैयाँ बैंक मुद्धती निक्षेप र १६ करोड ७९ लाख दुई हजार रुपैयाँ बैंक मौज्दात राखेको छ ।